काठमाडौं। बजारमा फेरि खाना पकाउने ग्यासको अभाव देखिएको छ। ग्यास खोज्दै उपभोक्ता डिलरदेखि डिलरसम्म धाउन बाध्य छन्। रित्तो सिलिन्डर बोकेर घण्टौँ लाइन बस्ने अवस्था फेरि दोहोरिएको छ।

नेपालआयल निगमले भने ग्यासको अभाव नभएको दाबी गरिरहेको छ। निगमका अनुसार अहिले दैनिक आवश्यकताभन्दा धेरै ग्यास आयात भइरहेको छ। दैनिक ९३ देखि ९५ बुलेट ग्यास भए पुग्ने ठाउँमा १४३ बुलेटसम्म आयात गरिएको दाबी छ। तर, बजारको अवस्था त्यसको ठीक उल्टो देखिएको छ।

डिलरमा ग्यास छैन। धेरैजसो उपभोक्ता खाली हात फर्किरहेका छन्।
निगमले पूरा तौलको १४.२ किलोग्राम ग्यास सिलिन्डर लागू गरेपछि बजारमा चाप बढेको बताएको छ। उपभोक्ताले सञ्चयका लागि ग्यास लिएको निगमको दाबी छ। तर, उपभोक्ताले भने आफूहरू आवश्यकताका लागि मात्रै ग्यास खोजिरहेको बताएका छन्।

यसअघि वैशाख र जेठमा ग्यासको खपत घटेको थियो। त्यसपछि असार अन्तिमबाट पूरा तौलको सिलिन्डर लागू गरियो। अहिले रित्ता सिलिन्डर एकैपटक बजारमा आउँदा आपूर्ति प्रणाली अस्तव्यस्त बनेको देखिएको छ।

आपूर्ति पर्याप्त भएको दाबी गर्ने सरकारी निकाय र बजारमा देखिएको वास्तविक अवस्था भने मेल खाँदैन। कागजमा ग्यास प्रशस्त देखिए पनि उपभोक्ताको भान्सामा ग्यास पुगेको छैन।

हरेक पटकजस्तै यसपटक पनि उपभोक्ताले सास्ती व्यहोर्नुपरेको छ। सरकार आश्वासनमै सीमित छ। निगमले आयात बढेको बताइरहेको छ। तर, बजारले अभाव देखाइरहेको छ। समस्या कहाँ छ भन्ने प्रश्नको स्पष्ट जवाफ अझै आएको छैन। ग्यासको सहज आपूर्ति सुनिश्चित गर्न सम्बन्धित निकायले तत्काल प्रभावकारी कदम चाल्नुपर्ने माग उपभोक्ताले गरेका छन्।