काठमाडौं। नेकपा (एमाले) का सांसद गुरु बरालले सुनसरीमा भएको घटनामा सरकारले समयमै शान्ति-सुरक्षा कायम गर्न नसकेको आरोप लगाएका छन्। सांस्कृतिक रीतिरिवाजका क्रममा भएको उक्त घटनाले समाजमा धार्मिक सद्भावमा असर पुग्ने जोखिम बढाएको भन्दै उनले सरकारसँग जवाफ मागेका छन्।

प्रतिनिधिसभाको बैठकमा बोल्दै सांसद बरालले सुनसरी घटनाको घाउ अझै निको हुन नसकेको उल्लेख गर्दै सरकारको सुरक्षा व्यवस्थापन कमजोर रहेको टिप्पणी गरे। उनले गृहमन्त्रीको भूमिकाप्रति पनि असन्तुष्टि जनाउँदै घटनापछि समाजलाई आश्वस्त पार्ने वातावरण निर्माण गर्न सरकार असफल भएको दाबी गरे।‘सांस्कृतिक रितिरिवाज अगाडी बढाउने क्रममा सुनसरीमा घटेको घटनामा सरकारले सुरक्षा दिन सकेन। सरकारले तत्काल शान्ति सुरक्षा कायम गर्न सकेन,’ उनले भने। 

उनले सुनसरी घटनाको निष्पक्ष र विश्वसनीय छानबिनका लागि न्यायिक आयोग गठन गर्नुपर्ने माग गरे। विद्यमान छानबिन समितिले घटनाको वास्तविकता बाहिर ल्याउन नसक्ने जिकिर गर्दै उनले स्वतन्त्र न्यायिक संयन्त्रमार्फत अनुसन्धान गरिनुपर्ने बताए। ‘सुनसरी घटनाको न्यायिक समितिबाट छानबिन हुनुपर्छ। छानबिन समितिले सुनसरी घटनाको छानबिन गर्न सक्दैन,’ बरालले भने। 

बरालले सरकारले पीडितलाई आर्थिक क्षतिपूर्ति दिन सक्ने भए पनि त्यसबाट नागरिकले भोगेको भावनात्मक पीडा मेटिन नसक्ने उल्लेख गरे। त्यसैले दोषी पहिचान गरी कानुनी कारबाही र सत्यतथ्य सार्वजनिक गर्नु नै न्यायको आधार हुने उनको भनाइ थियो।

यसैक्रममा उनले विराटनगरका एक उद्योगी-व्यवसायीको घरमा सुरक्षा निकायले गरेको छापाप्रति पनि आपत्ति जनाए। पर्याप्त आधार र संवेदनशीलता बिना गरिएको कारबाहीले ती व्यवसायीलाई अन्तर्राष्ट्रिय ठगसरह व्यवहार गरिएको अनुभूति गराएको उनको आरोप थियो। यस्ता गतिविधिले सम्बन्धित व्यक्तिको प्रतिष्ठामा गम्भीर आँच पुगेको मात्र नभई उद्योगी तथा व्यवसायी समुदायमा त्रासको वातावरण सिर्जना भएको उनले बताए।

सांसद बरालले सरकारको आर्थिक नीति र बजार व्यवस्थापनप्रति पनि असन्तुष्टि व्यक्त गरे। बजारमा महँगी निरन्तर बढिरहँदा त्यसलाई नियन्त्रण गर्न सरकार पूर्ण रूपमा असफल भएको उनको आरोप थियो। उपभोग्य वस्तुको मूल्यवृद्धिले आम नागरिकको दैनिक जीवन कष्टकर बन्दै गइरहेको उल्लेख गर्दै उनले बजार अनुगमन प्रभावकारी बनाउन र मूल्य नियन्त्रणका लागि ठोस कदम चाल्न सरकारसँग माग गरे।