काठमाडौं। नेपाली कांग्रेसकी सांसद रेनुका काउचाले प्रधानमन्त्री बालेन्द्र शाहलाई प्रतिपक्षबाट समेत सहयोग पाउने बताएकी छन्।

सोमबार प्रतिनिधिसभाको बैठकमा बोल्दै उनले प्रधानमन्त्री शाहलाई सत्य स्वीकार गर्दै राजनीतिक संवाद र सहकार्यको बाटोमा अघि बढ्न आग्रह गरिन्।

‘प्रधानमन्त्रीजी नडराउनुहोस्, तपाईं एक्लो हुनुहुन्न । तपाईंको साथमा प्रतिपक्ष छ,’ उनले भनिन्, ‘सत्य स्वीकार गर्नुहोस् । गलत भएका छन् भने सच्याउने साहस देखाउनुहोस्।’

काउचाले युवा पुस्ताबाट प्रधानमन्त्री बनेका शाहप्रति आफूहरूको अपेक्षा रहेको बताइन्। युवा नेतृत्वले मुलुकमा सकारात्मक परिवर्तन ल्याउने विश्वास रहेकाले प्रधानमन्त्रीलाई असफल हुने छुट नरहेको उनको भनाइ थियो।

उनले प्रधानमन्त्रीले राजनीतिक दल तथा प्रतिपक्षसँग संवाद बढाएर सरकार सञ्चालन गर्नुपर्ने संकेत गर्दै आवश्यक अवस्थामा प्रतिपक्ष पनि सहयोग गर्न तयार रहेको बताइन्।

उनको अभिव्यक्ति संसद्मा प्रधानमन्त्री शाहप्रति कांग्रेसको पूर्ण विरोधभन्दा पनि सुधारका लागि सहकार्य र संवादको प्रस्तावका रूपमा आएको देखिन्छ।