काठमाडौं। नेकपा (एमाले)का सांसद लक्ष्मीप्रसाद पोखरेलले संसद्को गरिमा कायम गर्न संसदीय पोशाकसम्बन्धी स्पष्ट व्यवस्था गर्न माग गरेका छन्। उनले प्रधानमन्त्री तथा मन्त्रीहरूलाई टी-सर्ट लगाएर संसद् बैठकमा सहभागी हुन रोक लगाउनुपर्ने बताएका छन्।

सोमबार बसेको प्रतिनिधिसभा बैठकमा बोल्दै सांसद पोखरेलले संसदीय पोशाकसम्बन्धी अनुशासन कायम गर्न सभामुखबाट रुलिङ हुनुपर्ने माग गरे।

उनले सन् २०२१ फेब्रुअरी ९ मा न्युजिल्यान्डको संसद्मा भएको घटना तथा सन् २०२३ मा क्यानडाको संसद्मा पोशाकसंहिता लागू गर्न गरिएको संसदीय रुलिङको उदाहरणसमेत प्रस्तुत गरे।

संसद्को गरिमा कायम गर्न सांस्कृतिक वा राष्ट्रिय पोशाकलाई प्राथमिकता दिनुपर्ने उनको भनाइ थियो। उनले प्रधानमन्त्री र मन्त्रीहरूलाई टी-सर्ट लगाएर संसद् प्रवेश गर्न रोक लगाउनुपर्ने माग गरे।

‘संसद्को गरिमा कायम गर्न सांस्कृतिक पोशाक वा राष्ट्रिय पोशाक अनिवार्य गरियोस्, प्रधानमन्त्री र मन्त्रीलाई टी-सर्ट लगाएर संसद्भित्र प्रवेश गर्न रोक लगाइयोस्,’ उनले भने।

त्यस्तै, संसद्को लोगो कोट, हाफकोट र ओभरकोटबाहेक टी-सर्ट, ज्याकेट, सर्ट, कुर्ता, ब्लाउज, सललगायतका पोशाकमा प्रयोग गर्न रोक लगाउनुपर्ने उनले बताए।

‘संसदीय पोशाकसम्बन्धी अनुशासन कायम गर्न रुलिङको माग गर्दछु,’ उनले भने।