काठमाडौं। राष्ट्रिय प्रजातन्त्र पार्टी (राप्रपा)ले कप्तानगञ्ज र गोलबजारमा भएका पछिल्ला घटनालाई लिएर सरकारको सुरक्षा व्यवस्थामाथि प्रश्न उठाउँदै धार्मिक तथा सामुदायिक तनाव रोक्न दीर्घकालीन नीति बनाउन माग गरेको छ।

सोमबार प्रतिनिधिसभा बैठकमा राप्रपा सांसद सरस्वती लामाले नागरिकको जिउधनको सुरक्षा गर्न नसक्नु राज्यको कमजोरी भएको बताइन्। धार्मिक वा अन्य कुनै बहानामा हुने हिंसाले अन्ततः सामाजिक सद्भावसँगै देशलाई नै क्षति पुर्‍याउने उनको भनाइ थियो।

उनले यस्ता घटना दोहोरिन नदिन सुरक्षा निकायबीच प्रभावकारी समन्वय, पूर्वतयारी र दीर्घकालीन सुरक्षा रणनीति आवश्यक रहेको बताइन्।

लामाले नेपालको बहुधार्मिक र बहुसांस्कृतिक पहिचानलाई ध्यानमा राख्दै सबै धर्म तथा आस्थाका केन्द्रलाई व्यवस्थित र पारदर्शी बनाउनुपर्ने प्रस्ताव अघि सारिन्। उनका अनुसार धार्मिक संस्थाहरू अनिवार्य रूपमा सरकारी निकायमा दर्ता हुनुपर्ने, आर्थिक स्रोत पारदर्शी बनाउनुपर्ने र नियमित लेखापरीक्षणको व्यवस्था गरिनुपर्छ।

भविष्यमा धार्मिक विवाद तथा द्वन्द्वको सम्भावना न्यूनीकरण गर्न एउटा आस्थाको केन्द्रदेखि अर्को आस्थाको केन्द्रबीचको दूरी र स्थानसम्बन्धी स्पष्ट मापदण्ड बनाउनुपर्ने मागसमेत उनले गरिन्।

यस्ता व्यवस्थालाई कुनै धर्ममाथिको हस्तक्षेपका रूपमा बुझ्न नहुने स्पष्ट पार्दै लामाले यसले सुशासन, पारदर्शिता र सामाजिक सद्भाव कायम गर्न सहयोग पुग्ने बताइन्।

राज्यले सर्वधर्म समभावको सिद्धान्तअनुसार सबै धर्म, संस्कृति र ऐतिहासिक धरोहरको समान संरक्षण गर्नुपर्ने उनको जोड थियो।

‘हाम्रो विविधता विभाजनको कारण होइन, राष्ट्रिय एकताको शक्ति बन्नुपर्छ,’ उनले भनिन्, ‘धर्मका नाममा हुने कानुनविपरीतका गतिविधि कडाइका साथ रोक्दै सबैका लागि समान कानुनी मापदण्ड लागू गरिनुपर्छ।’