काठमाडौं। राज्य व्यवस्था तथा सुशासन समितिका पूर्वसभापति रामहरि खतिवडाले जिल्लाका जीर्ण तथा निर्माणाधीन झोलुङ्गे पुलको अवस्थाबारे सम्बन्धित निकायको ध्यानाकर्षण गराएका छन्।

खतिवडाले सुनकोशी गाउँपालिका-२, बालखु पञ्चकन्यामा जीर्ण अवस्थामा रहेको झोलुङ्गे पुल तथा सिद्धिचरण नगरपालिका क्षेत्रमा निर्माणाधीन पर्यटकीय झोलुङ्गे पुलको अवस्थाबारे सस्पेन्सन ब्रिज डिभिजनका प्रमुख शंकर बुढाथोकीलाई जानकारी गराउँदै आवश्यक पहल गर्न आग्रह गरेका हुन्।

केही दिनअघि ओखलढुंगाका विभिन्न कार्यक्रममा सहभागी हुने क्रममा खतिवडाले दुवै पुलको स्थलगत निरीक्षण गरेका थिए।

निरीक्षणका क्रममा उनले पुलको अवस्था, निर्माणको प्रगति तथा स्थानीयवासीले भोग्नुपरेका समस्याबारे जानकारी लिएका थिए।

स्थानीयवासीको आवतजावतमा महत्वपूर्ण भूमिका खेल्दै आएको बालखु पञ्चकन्याको जीर्ण झोलुङ्गे पुलको तत्काल मर्मत गर्नुपर्नेमा खतिवडाले जोड दिएका छन्।

त्यस्तै, सिद्धिचरण नगरपालिका क्षेत्रमा निर्माणाधीन पर्यटकीय झोलुङ्गे पुलको कामलाई पनि प्रभावकारी रूपमा अघि बढाउन उनले आग्रह गरेका छन्।

पुलको अवस्थाका कारण स्थानीयवासीले भोग्नुपरेका कठिनाइलाई सम्बन्धित निकायसम्म पुर्‍याउँदै आवश्यक प्राविधिक तथा प्रशासनिक पहल गर्न खतिवडाले सस्पेन्सन ब्रिज डिभिजनका प्रमुख बुढाथोकीसँग आग्रह गरेका छन्।

उनले जिल्लाका ग्रामीण तथा पर्यटकीय क्षेत्रमा रहेका झोलुङ्गे पुलको नियमित निरीक्षण, मर्मतसम्भार तथा निर्माण कार्यलाई सम्बन्धित निकायले प्राथमिकता दिनुपर्नेमा जोड दिएका छन्।