काठमाडौं । प्राविधिक शिक्षा तथा व्यावसायिक तालिम परिषद् (सीटीईभीटी) का करार, मासिक तथा दैनिक ज्यालादारी श्रमिकहरूले रोजगारी सुरक्षालगायत विभिन्न माग राख्दै परिषद्को सानोठिमीस्थित केन्द्रीय कार्यालय घेराउ गर्ने भएका छन्।

करार, मासिक तथा दैनिक ज्यालादारी श्रमिक केन्द्रीय संघर्ष समितिले कार्यरत श्रमिकलाई हालकै पदमा निरन्तर काम गर्न पाउने व्यवस्था गर्नुपर्ने, रोजगारीको सुरक्षा र सेवा–सुविधा सुनिश्चित गर्नुपर्नेलगायतका माग अघि सारेको छ।

समितिले रोजगारीबाट बाहिरिएका ७४ जना श्रमिकलाई पुनः काममा फर्काउनुपर्ने माग गरेको छ। त्यस्तै, करार कर्मचारीलाई दसैं पेश्की, पोशाक, प्रशिक्षण, दुर्गम तथा स्थानीय भत्तालगायतका सुविधा उपलब्ध गराउनुपर्ने माग पनि समितिको छ।

मासिक ज्यालादारी कर्मचारीलाई हालकै अवस्थामा निरन्तर काम गर्न दिनुपर्ने तथा पोशाकलगायतका सुविधा उपलब्ध गराउनुपर्ने समितिको माग छ। उनीहरूको सेवा तथा कार्यअवस्था एकतर्फी रूपमा परिवर्तन गर्न नहुनेसमेत समितिले जनाएको छ।

आन्दोलनमा सहभागी भएकै आधारमा कुनै पनि श्रमिकमाथि पूर्वाग्रह, विभेद वा प्रतिशोधपूर्ण व्यवहार नगर्न समितिले व्यवस्थापनसँग आग्रह गरेको छ।

श्रमिकहरूले आफ्ना माग सम्बोधन गर्ने लिखित प्रतिबद्धता, कार्यान्वयनको समयसीमा र स्पष्ट कार्ययोजना सार्वजनिक गर्नसमेत माग गरेका छन्। व्यवस्थापनसँग टकरावको बाटो रोज्नुभन्दा संवाद र सहमतिमार्फत समस्या समाधान गर्न आफूहरू तयार रहेको समितिको भनाइ छ।

माग सम्बोधन नभएसम्म खबरदारीका कार्यक्रम जारी राख्ने समितिले जनाएको छ।

तस्वीरहरू: