काठमाडौं । जल तथा मौसम विज्ञान विभागअन्तर्गतको बाढी पूर्वानुमान महाशाखाले देशका प्रमुख तथा मझौला नदीहरूमा तत्काल ठूलो बाढीको जोखिम नरहेको जनाएको छ। मंगलबार बिहान जारी गरिएको बुलेटिनअनुसार अधिकांश ठूला नदीको जलसतह हाल सतर्कता तहभन्दा तलै रहेको छ।

महाशाखाका अनुसार कोशी, नारायणी, बागमती, कर्णाली र महाकाली नदी तथा तिनका सहायक नदीहरूमा जलसतह सामान्य अवस्थामा छ। कन्काई, कमला, बबई, पूर्वी राप्ती तथा पश्चिम राप्ती नदीमा पनि हाल ठूलो बाढीको जोखिम देखिएको छैन।

यद्यपि ठूला नदीमा अवस्था सामान्य रहे पनि पहाडी तथा हिमाली क्षेत्रका साना नदी तथा खोलामा भने आकस्मिक बाढीको जोखिम रहेको महाशाखाले जनाएको छ। सोमबार गरिएको पूर्वानुमानअनुसार देशका ३२ जिल्लामा बहने साना नदी तथा खोलामा पानीको बहाव उल्लेख्य बढ्न सक्ने सम्भावना छ।

पाँचथर, तेह्रथुम, धनकुटा, ताप्लेजुङ, संखुवासभा, सिन्धुपाल्चोक, काठमाडौं, भक्तपुर, ललितपुर, काभ्रेपलाञ्चोक, मकवानपुर र चितवनका साना नदी तथा खोलामा जलसतह बढ्न सक्ने जनाइएको छ।

त्यस्तै, गोरखा, लमजुङ, कास्की, तनहुँ, स्याङ्जा, पर्वत, बागलुङ, म्याग्दी, गुल्मी, अर्घाखाँची, प्युठान, रुकुम पूर्व, रुकुम पश्चिम, रोल्पा, जाजरकोट, सल्यान, दैलेख, सुर्खेत, बझाङ र डोटी आसपासका खोलामा आकस्मिक बाढीको मध्यम जोखिम रहेको महाशाखाले जनाएको छ।

मौसम पूर्वानुमानलाई ध्यानमा राख्दै महाशाखाले आगामी दुई दिनसम्म विशेष सतर्कता अपनाउन आग्रह गरेको छ। बुधबार र बिहीबार विशेषगरी कोशी र गण्डकी प्रदेश भएर बहने केही साना नदी तथा खोलामा पानीको बहाव अचानक बढ्न सक्ने सम्भावना रहेको जनाइएको छ।

महाशाखाले जोखिमयुक्त क्षेत्रका नदी तथा खोला किनारमा बसोबास गर्ने सर्वसाधारणलाई सतर्क रहन तथा नदी र खोलाको बहाव बढेको अवस्थामा अनावश्यक रूपमा किनारमा नजान आग्रह गरेको छ।