काठमाडौं। नेकपा एमालेका सांसद चन्द्रेश्वर मण्डलले प्रधानमन्त्री वालेन्द्र शाह(बालेन)को विवादित अभिव्यक्ति सच्याउन सभामुख डीपी अर्यालले पहल गर्नुपर्ने बताएका छन्।

प्रतिनिधिसभाको बैठकमा बोल्दै सांसद मण्डलले प्रधानमन्त्रीले राष्ट्रिय स्वतन्त्र पार्टीका सभापति रवि लामिछाने भारत भ्रमणमा जानुअघि दिल्लीलाई खुसी पार्ने उद्देश्यले उक्त अभिव्यक्ति दिएको आरोप लगाए।

उनले सभामुख अर्याललाई प्रधानमन्त्रीसँग छलफल गरेर आफ्नो अभिव्यक्ति फिर्ता लिन आग्रह गर्न सुझाए।

‘तपाईं जस्तो शालीन, अनुभवी, योग्य व्यक्तित्व हामीले पाएका छौँ, हामीलाई गर्व छ। तपाईंले पनि प्रधानमन्त्रीजीसँग वार्ता गरी आफ्ना अभिव्यक्ति फिर्ता लिन प्रयास गरिदिनुस्,’ उनले भने।

प्रधानमन्त्रीले आफैँ रोस्ट्रममा आएर अभिव्यक्ति फिर्ता लिने सम्भावना कम रहेको भन्दै सभामुखले पहल गर्नुपर्ने उनको भनाइ थियो।

मण्डलले सभामुखले आवश्यक पहल गरेर प्रधानमन्त्रीको विवादित भनाइ संसद्को अभिलेखबाट हटाउनसमेत आग्रह गरे।

एमाले सांसद मण्डलले सत्तारूढ रास्वपाका सांसदहरूलाई पनि संसद्मा प्रस्तुत हुँदा विषयको सही र गलत पक्ष छुट्याउन आग्रह गरे।

जनताले रास्वपालाई बहुमत दिएको उल्लेख गर्दै उनले संसद्मा हुने हरेक विषयमा ढ्यापढ्याप गरेर समर्थन वा विरोध गर्ने प्रवृत्ति त्याग्न सुझाव दिए।

‘जनताले तपाईंलाई बहुमत प्रदान गरेको छ। संसद्को बैठकमा ठिक वा बेठीक छुट्टाउने प्रयास गर्नुस्। सबैमा ढ्यापढ्याप नगर्नुस्। यो क्रियाकलापले आगामी दिनमा तपाईंहरूलाई पनि भलो हुँदैन,’ उनले भने।

उनले संसद्को गरिमा कायम राख्न सत्तापक्ष र प्रतिपक्ष दुवैका सांसदले विषयवस्तुको गम्भीरता बुझेर जिम्मेवार ढंगले प्रस्तुत हुनुपर्नेमा जोड दिए।