काठमाडौं। नेकपा एमालेका उपमहासचिव योगेश भट्टराईले नयाँ राजनीतिक शक्तिका कमजोरीलाई आधार बनाएर पुराना दलका नेताहरूले आफ्नो सान्दर्भिकता र पुनरोदयको आधार खोज्नु गलत हुने बताएका छन्।

उनले राष्ट्रिय स्वतन्त्र पार्टी (रास्वपा) को कमजोर बन्दै गएको अवस्थालाई देखाएर पुराना दलका शीर्ष नेताहरू आत्मरतिमा रमाउनु झनै ठूलो राजनीतिक भूल हुने टिप्पणी गरेका छन्।

भट्टराईले शुक्रबार सामाजिक सञ्जालमार्फत पुराना र नयाँ दुवै राजनीतिक शक्तिको कार्यशैलीमाथि प्रश्न उठाएका हुन्। उनका अनुसार रास्वपाको उदय पुराना दलका कमजोरी र प्रमुख नेताहरूको असक्षमताबाट बनेको राजनीतिक परिस्थितिको परिणाम थियो।

‘पुराना पार्टी (एमाले, कांग्रेस र माओवादी) को अकर्मण्यता र तिनका प्रमुख नेताहरूको अयोग्यतालाई नै आफ्नो उत्थानको प्रमुख आधार मानेर रास्वपा पार्टी जन्माइयो,’ उनले लेखेका छन्।

रवि लामिछाने र बालेन शाहलाई नेतृत्वमा अघि सार्दा रास्वपाले सुरुवाती चरणमा उल्लेख्य राजनीतिक सफलता हासिल गरे पनि पार्टी निर्माणका लागि आवश्यक विचार, सिद्धान्त, नीति, वर्गीय तथा सामाजिक आधार निर्माणमा पर्याप्त ध्यान नदिँदा अहिले कमजोर हुँदै गएको उनको विश्लेषण छ।

‘रवि, बालेनलाई नेता बनाइयो, तत्काल ठुलै सफलता पनि मिल्यो। तर रवि, बालेन र रास्वपाले पार्टी निर्माणका लागि आवश्यक पर्ने विचार, सिद्धान्त, नीति, वर्ग र सामाजिक आधार निश्चित गर्नतर्फ ध्यान नदिँदा शिखरबाट ओरालो यात्रा सुरु भएको छ,’ भट्टराईले भनेका छन्।

रास्वपाको ओरालो यात्रा तथा रवि लामिछाने र बालेन शाहको अयोग्यतालाई पुराना दलका नेताहरूले आफ्नो नेतृत्वको सान्दर्भिकता पुनःस्थापित गर्ने आधार ठान्नु उचित नहुने उनको भनाइ छ।

‘रास्वपाको ओरालो यात्रा र रवि र बालेनको अयोग्यतालाई आफ्नो नेतृत्वको सान्दर्भिकता र पुनरोदयको आधार ठानेर आत्मरतिमा मस्त छन्,’ भट्टराईले टिप्पणी गरेका छन्।

उनले अरूको कमजोरी र असफलताको मूल्यांकन गरेर रमाइरहेका राजनीतिक नेतृत्वहरू आफ्नै राजनीतिक परीक्षामा भने असफलताको संकेत देखिरहेको पनि बताएका छन्।

भट्टराईले नेतृत्वमा टिकिरहन वा शासन लम्ब्याउन विरोधीमाथि बदला र प्रतिशोधको राजनीति प्रभावकारी आधार बन्न नसक्ने बताएका छन्। यस्तो प्रवृत्ति विगतमा पनि असफल भएको र अहिले पनि त्यसबाट राजनीतिक सफलता हासिल गर्न नसकिने उनको टिप्पणी छ।

‘बाहिर र भित्रका विरोधीमाथिको बदला र प्रतिशोध नेतृत्वमा टिक्ने र शासनलाई लम्ब्याउने आधार न हिजोकालाई काम लाग्यो, न आजकालाई काम लाग्ने छ,’ उनले लेखेका छन्।

पुराना दलका प्रमुख नेताहरूले विगतका कमजोरीबाट पाठ सिक्नुको सट्टा फेरि त्यही गल्ती दोहोर्‍याउन थालेको भन्दै भट्टराईले नयाँ शक्तिको असफलतालाई आफ्नो राजनीतिक पुनरागमनको अवसरका रूपमा मात्रै हेर्न नहुने संकेत गरेका छन्।