नवलपरासी। पश्चिम नवलपरासीको सुस्ता क्षेत्रमा बाढीको जोखिम न्यूनीकरणका लागि स्थानीय बासिन्दाले श्रमदानसहित निर्माण गरेको बाँध पछिल्लो बाढीले बगाएपछि सुस्ता क्षेत्र थप जोखिममा परेको छ।

सुस्ता बचाउका लागि स्थानीयवासी, प्रहरी र नेपाली सेनासमेतको सहयोगमा निर्माण गरिएको संरचना बाढीले क्षतिग्रस्त बनाएपछि पुनः निर्माणको काम भने रोकिएको स्थानीयले बताएका छन्।

सुस्ता बचाउ संघर्ष समितिका संयोजक बाबु खानका अनुसार असार १६ गतेदेखि स्थानीयवासीले बाढी नियन्त्रणका लागि बाँध निर्माणको काम सुरु गरेका थिए। स्थानीयले ठूलो संख्यामा श्रमदान गरेका थिए भने नेपाल प्रहरी र नेपाली सेनाले समेत निर्माण कार्यमा सहयोग गरेका थिए। त्यसपछि बाँध निर्माणको काम निरन्तर अघि बढिरहेको थियो।

खानका अनुसार स्थानीयवासीले आफ्नो गाउँ र बस्ती जोगाउने उद्देश्यले सीमित स्रोतसाधनका बीच ठूलो मेहनत गरेर बाँध निर्माण गरेका थिए। तर पछिल्लो समय आएको ठूलो बाढीले उनीहरूले निर्माण गरेका अधिकांश संरचना बगाएर लगेको छ।

‘१६ गतेदेखि हामी बाँध हाल्ने काममा लागेका थियौँ। त्यसपछि एसएसबीसँग सम्बन्धित भिडियोसमेत हामीले सार्वजनिक गरेका थियौँ। यहाँ सुस्तावासीले ठूलो श्रमदान गरेका छन्। प्रहरीले र सेनाले पनि सहयोग गरेका थिए। अहिले पनि काम भइरहेकै थियो,’ खानले भने।

तर पछिल्लो बाढीले गाउँ नै जोखिममा पार्ने अवस्था सिर्जना गरेको उनको भनाइ छ। ‘हिजो राति आएको बाढीले गाउँ नै जोखिममा परेको छ। हामीले जति काम गरेका थियौँ, त्यो सबै बाढीले बगाएर लगेको छ,’ उनले भने।

बाढीले निर्माण गरिएको बाँध तथा अन्य संरचना क्षतिग्रस्त भएपछि तत्काल पुनःनिर्माण र बाढी नियन्त्रणका लागि सरकारी निकायबाट ठोस पहल हुने अपेक्षा स्थानीयले गरेका थिए। मुख्यमन्त्री, गाउँपालिका पदाधिकारी तथा वडाध्यक्षसमेत प्रभावित क्षेत्रको निरीक्षणमा आएर आश्वासन दिए पनि त्यसपछि काम अघि नबढेको खानले गुनासो गरे।

उनका अनुसार अहिले मुख्य समस्या बजेट अभाव बनेको छ। आवश्यक रकम उपलब्ध नभएका कारण बाँध पुनःनिर्माण तथा बाढी नियन्त्रणको काम रोकिएको उनले बताए।

‘मुख्यमन्त्री र गाउँपालिकाका प्रतिनिधि आएका थिए। वडाध्यक्ष पनि आउनुभएको थियो। उहाँहरूले आश्वासन दिएर जानुभयो। तर अहिले काम अघि बढेको छैन। पैसा नभएकाले काम रोकिएको छ,’ खानले भने।

स्थानीयवासीले आफ्नो ज्यान र बस्ती जोगाउन श्रमदान गरेर संरचना निर्माण गरे पनि प्राकृतिक विपत्तिले त्यसलाई बगाएपछि उनीहरू थप निराश भएका छन्।

अब सरकारबाट तत्काल बजेट निकासा गरी बाढीले क्षति पुर्‍याएको बाँध पुनःनिर्माण गर्नुपर्ने उनीहरूको माग छ।

भिडियो: