काठमाडौं। नेकपा एमालेले सरकारलाई दिएको समर्थन फिर्ता लिएपछि अल्पमतमा परेका बागमती प्रदेशका मुख्यमन्त्री इन्द्र बानियाँले सोमबार राजीनामा दिएका छन्।

मुख्यमन्त्री बानियाँले सोमबार बस्ने प्रदेशसभा बैठकमा विश्वासको मत लिने तयारी गरेका थिए। तर, आवश्यक बहुमत जुट्ने अवस्था नदेखिएपछि उनले विश्वासको मतको सामना गर्नुअघि नै पदबाट राजीनामा दिएका हुन्।

एमालेले समर्थन फिर्ता लिएसँगै बानियाँ नेतृत्वको सरकार अल्पमतमा परेको थियो। सरकार टिकाउन आवश्यक समर्थन जुटाउने प्रयास भए पनि विपक्षी दल तथा अन्य राजनीतिक शक्तिबाट पर्याप्त साथ पाउने सम्भावना कमजोर भएपछि मुख्यमन्त्रीले राजीनामाको बाटो रोजेका हुन्।

बानियाँको राजीनामासँगै बागमती प्रदेशमा नयाँ सरकार गठनको प्रक्रिया अघि बढ्ने भएको छ। अब प्रदेश प्रमुखले संविधानअनुसार नयाँ सरकार गठनका लागि प्रक्रिया अघि बढाउनेछन्।