धनुषा। धनुषाको सबैला नगरपालिका-११ का ५७ परिवारले जग्गा नापजाँच भएको करिब १० वर्षपछि जग्गाधनी पुर्जा पाएका छन्।

नापी कार्यालय धनुषाले साविक मखनाहा गाउँ विकास समिति–६, ७, ८ र ९ अन्तर्गत पर्ने गाउँ ब्लक अर्थात् स्ववासी जग्गाको पुर्जा वितरण गरेको हो।

उक्त क्षेत्रको जग्गा नापजाँच आर्थिक वर्ष २०७२/७३ मै सम्पन्न भएको थियो। तर जग्गा दर्ताका लागि आवश्यक प्रक्रिया अघि बढाउन स्थानीयको सहभागिता न्यून भएपछि पुर्जा वितरण लामो समयदेखि रोकिएको थियो।

नापनक्सा भइसकेका जग्गाको आवश्यक कानुनी प्रक्रिया पूरा गरेपछि नापी कार्यालयले ५७ परिवारलाई जग्गाधनी पुर्जा उपलब्ध गराएको जनाएको छ।

पुर्जा पाएसँगै वर्षौंदेखि स्ववासीका रूपमा बसोबास गर्दै आएका ती परिवारले आफ्नो जग्गामाथिको औपचारिक कानुनी स्वामित्व प्राप्त गरेका छन्।

लामो समयदेखि रोकिएको जग्गा दर्ता प्रक्रिया अघि बढेपछि स्थानीयमा खुसी छाएको छ।