काठमाडौं। नेपाली कांग्रेसका नेता तथा पूर्वसांसद रामहरि खतिवडाले ओखलढुङ्गामा पटक-पटक विद्युत् अवरुद्ध हुने समस्या तत्काल समाधान गर्न नेपाल विद्युत् प्राधिकरणसँग आग्रह गरेका छन्।

काठमाडौंमा पूर्वसांसद खतिवडा र मानेभञ्ज्याङ गाउँपालिकाका अध्यक्ष ज्ञानेन्द्र रुम्दालीले नेपाल विद्युत् प्राधिकरणका कायममुकायम कार्यकारी निर्देशक दीर्घायुकुमार श्रेष्ठसँग भेट गरी जिल्लामा देखिएको विद्युत् आपूर्तिको समस्याबारे ध्यानाकर्षण गराएका हुन्।

भेटका क्रममा खतिवडाले ओखलढुङ्गामा लामो समयदेखि विद्युत् आपूर्तिमा अनियमितता हुँदै आएको र पटक-पटक विद्युत् अवरुद्ध हुँदा जिल्लावासीको दैनिक जनजीवन प्रभावित भइरहेको बताए।

विद्युत् आपूर्तिमा देखिएको समस्या सामान्य प्राविधिक समस्या मात्र नभई जिल्लाको समग्र विकाससँग जोडिएको विषय भएकाले यसको दीर्घकालीन समाधान खोज्न उनले प्राधिकरणसँग आग्रह गरे।

खतिवडाले विद्युत् प्रसारण तथा वितरण प्रणालीमा आवश्यक प्राविधिक सुधार, पूर्वाधारको स्तरोन्नति तथा क्षमता विस्तारका कामलाई प्राथमिकताका साथ अघि बढाउनुपर्ने बताए। नियमित र भरपर्दो विद्युत् आपूर्ति नहुँदा सर्वसाधारणसँगै उद्योग, व्यवसाय, सरकारी तथा निजी क्षेत्रका सेवा र स्थानीय उत्पादनमा समेत असर पर्ने उनको भनाइ छ।

उनले ओखलढुङ्गा जिल्लाको विद्युत् आपूर्ति सुधारका लागि तत्काल गर्नुपर्ने काम पहिचान गरी त्यसको कार्यान्वयनमा प्राधिकरणले सक्रियता देखाउनुपर्ने बताए।

जिल्लामा विद्युत् सेवा विस्तार भए पनि नियमित आपूर्तिमा समस्या कायम रहेकाले दीर्घकालीन समाधानका लागि प्रसारण तथा वितरण संरचनाको अवस्था अध्ययन गरी आवश्यक सुधार गर्नुपर्ने उनले जोड दिए।

खतिवडाले दूधकोशी जलविद्युत् आयोजनालाई समेत छिटो कार्यान्वयनमा लैजान प्राधिकरणसँग आग्रह गरेका छन्। ओखलढुङ्गालगायत आसपासका जिल्लाको विद्युत् आपूर्ति सुधार र स्थानीय आर्थिक गतिविधि विस्तारका लागि आयोजना महत्वपूर्ण हुने भएकाले यसको निर्माण तथा सञ्चालनसँग सम्बन्धित प्रक्रिया तीव्र बनाउनुपर्ने उनले बताए।

उनका अनुसार दूधकोशी जलविद्युत् आयोजना अघि बढेमा विद्युत् उत्पादनमा मात्र योगदान पुग्ने नभई स्थानीय स्तरमा रोजगारी सिर्जना, पूर्वाधार विकास तथा आर्थिक गतिविधि विस्तारमा समेत सहयोग पुग्नेछ। आयोजना आसपासका क्षेत्रमा उद्योग तथा व्यवसाय सञ्चालनको वातावरण निर्माण गर्न पनि भरपर्दो विद्युत् आपूर्ति आवश्यक हुने उनले बताए।

ओखलढुङ्गाको विकास, उद्योग तथा व्यवसाय विस्तार, कृषि उत्पादनको व्यावसायीकरण र पर्यटन प्रवर्द्धनका लागि विद्युत् महत्वपूर्ण आधारभूत पूर्वाधार भएको उल्लेख गर्दै खतिवडाले जिल्लावासीलाई नियमित र गुणस्तरीय विद्युत् सेवा उपलब्ध गराउन प्राधिकरणले ठोस कदम चाल्नुपर्ने बताए।

भेटमा मानेभञ्ज्याङ गाउँपालिकाका अध्यक्ष ज्ञानेन्द्र रुम्दालीले पनि स्थानीय तहमा विद्युत् आपूर्तिसँग सम्बन्धित समस्या समाधान गर्न प्राधिकरणको ध्यानाकर्षण गराएका थिए।

स्थानीयस्तरमा विद्युत् सेवा प्रभावकारी नहुँदा विकास निर्माण तथा जनजीवनमा परेको असरबारे उनले जानकारी गराएका थिए।

प्राधिकरणका कायममुकायम कार्यकारी निर्देशक दीर्घायुकुमार श्रेष्ठले ओखलढुङ्गामा देखिएको विद्युत् आपूर्तिसम्बन्धी समस्याबारे आवश्यक पहल गर्ने प्रतिबद्धता जनाएका छन्। उनले समस्या समाधानका लागि आवश्यक प्राविधिक तथा व्यवस्थापकीय पक्षमा ध्यान दिने बताएका छन्।

श्रेष्ठले दूधकोशी जलविद्युत् आयोजना सञ्चालनसँग सम्बन्धित विषयलाई समेत प्राथमिकताका साथ अघि बढाउने प्रतिबद्धता व्यक्त गरेका छन्। आयोजना अघि बढाउन आवश्यक प्रक्रिया तथा कामलाई गति दिने विषयमा प्राधिकरण सकारात्मक रहेको उनको भनाइ थियो।