काठमाडौं। नेकपा एमालेका सांसद सोमनाथ पोर्तेलले वर्तमान सरकारको कार्यशैली र सत्तारूढ राष्ट्रिय स्वतन्त्र पार्टी (रास्वपा)को भूमिकामाथि संसद्मा कडा आलोचना गरेका छन्।

राष्ट्रियसभाको बुधबारको बैठकमा विशेष समय लिएर बोल्दै सांसद पोर्तेलले सरकारका कारण जनताले विभिन्न समस्या झेल्नुपरेको र मुलुकका आर्थिक सूचकाङ्कसमेत कमजोर बन्दै गएको दाबी गरे।

उनले रास्वपाको उदय र सरकारले पाएको राजनीतिक अवसरलाई चर्चित हिन्दी गीत ‘उपरवाला जब भी देता, देता छप्पर फाड के’ सँग तुलना गर्दै व्यङ्ग्य गरे।

पोर्तेलले रास्वपाले निर्वाचनका बेला ठूलो संख्यामा सिट जितेर धेरै काम गर्ने दाबी गरे पनि जनताले उसको कार्यसम्पादनलाई अपेक्षाअनुसार नपाएको आरोप लगाए।

‘अरू बेला दुई–तीन मिनेट बोल्न पाउने, आज १५ मिनेट पाएँ, मलाई रास्वपाको जस्तै लाग्यो,’ उनले भने, ‘उहाँहरूले १८२ सिट ल्याए, १०० वटा काम गर्छु भन्नुभएको थियो, तर जनताले मूल्याङ्कनमा डी ग्रेड मात्र दिएका छन्।’

सांसद पोर्तेलले पछिल्लो समय बजारमा देखिएको एलपी ग्यासको अभावलाई समेत सरकारको कार्यशैलीसँग जोडेर आलोचना गरे। उनका अनुसार सर्वसाधारणले खाना पकाउन आवश्यक ग्यास तथा दाउरासमेत सहज रूपमा पाउन नसक्ने अवस्था सिर्जना भएको छ।

उनले व्यङ्ग्य गर्दै सरकारले इन्डक्सन चुलो प्रयोग गर्न प्रोत्साहन गरे पनि विद्युत् आपूर्ति भरपर्दो हुन नसकेको बताए।

‘चन्द्रमाबाट हेर्दा चीनको ग्रेट वाल देखिन्थ्यो रे, अहिले त नेपालको ग्यासको लाइन पनि देखिन थाल्यो रे,’ पोर्तेलले भने।

उनले सरकारका नीति तथा कामकारबाहीले जनतालाई राहत दिन नसकेको दाबी गर्दै दैनिक उपभोग्य वस्तुको सहज आपूर्ति, विद्युत् तथा अन्य आधारभूत सेवामा सुधार गर्न सरकार गम्भीर हुनुपर्ने बताए।