काठमाडौं। इरानसँग जारी युद्धप्रति अमेरिकी जनताको समर्थन घट्दै गएको छ। रोयटर्स/इप्सोसको पछिल्लो सर्वेक्षणले युद्धको समर्थन द्वन्द्व सुरु भएयताकै न्यून विन्दुमा पुगेको छ।

यसको असर राष्ट्रपति डोनल्ड ट्रम्पको लोकप्रियतामा समेत परेको सर्वेक्षणले देखाएको छ।

चार दिन लगाएर गरिएको सर्वेक्षणमा सहभागीमध्ये ३१ प्रतिशत अमेरिकीले मात्रै इरानविरुद्ध अमेरिकी सैन्य कारबाहीलाई समर्थन गरेका छन्। मार्चमा गरिएको सर्वेक्षणमा यस्तो समर्थन ३७ प्रतिशत थियो भने यसै महिनाको सुरुआतमा ३४ प्रतिशत थियो।

युद्धप्रतिको समर्थन घट्नुमा ट्रम्पको प्रमुख राजनीतिक आधार मानिने रिपब्लिकन मतदाताको धारणा परिवर्तन मुख्य कारण देखिएको छ। मार्चमा ७७ प्रतिशत रिपब्लिकनले युद्धलाई समर्थन गरेका थिए। अहिले यो संख्या घटेर ६९ प्रतिशतमा पुगेको छ।

युद्धप्रतिको असन्तुष्टिको प्रभाव ट्रम्पको कार्यसम्पादनप्रतिको जनमतमा पनि देखिएको छ। लगातार दोस्रो सर्वेक्षणमा केवल ३३ प्रतिशत अमेरिकीले राष्ट्रपतिका रूपमा ट्रम्पको कामलाई अनुमोदन गरेका छन्। रोयटर्स/इप्सोसका पछिल्ला सर्वेक्षणमा ट्रम्पको पहिलो वा दोस्रो कार्यकालमै यो सबैभन्दा न्यून अनुमोदन दर हो।

इरानमाथि अमेरिका–इजरायलको संयुक्त सैन्य कारबाही फेब्रुअरी २८ मा सुरु भएको थियो। ट्रम्पले इरानलाई आणविक हतियार विकास गर्नबाट रोक्न सैन्य कारबाही आवश्यक भएको दाबी गर्दै आएका छन्।

तर द्वन्द्व लामिँदै जाँदा अमेरिकी जनताको चिन्ता भने बढिरहेको छ। सर्वेक्षणमा सहभागीमध्ये ८३ प्रतिशतले युद्ध लामो समयसम्म जारी रहने अनुमान गरेका छन्। यसअघि महिनाको सुरुआतमा यस्तो धारणा राख्नेको संख्या ८० प्रतिशत थियो।

युद्धका कारण ऊर्जा आपूर्तिमा परेको असरले अमेरिकी उपभोक्तालाई समेत प्रत्यक्ष प्रभाव पारेको छ। इरानले क्षेत्रीय तेल निर्यातमा दबाब कायम राख्दा अमेरिकामा पेट्रोलको मूल्य युद्ध सुरु हुनुअघिको तुलनामा प्रतिग्यालन एक डलरभन्दा बढी महँगो भएको सर्वेक्षणमा उल्लेख छ।

ट्रम्प प्रशासनले इरानमाथि आर्थिक दबाब थप बढाउने संकेत गरिरहेको छ। अर्थमन्त्री स्कट बेसेन्टले इरानसँग व्यापार गर्ने देशमाथि थप प्रतिबन्ध लगाउन सकिने बताएका छन्। यद्यपि, तत्काल कुनै दण्डात्मक कदम घोषणा गरिएको छैन।

युद्ध र बढ्दो महँगीले ट्रम्प प्रशासनमाथि राजनीतिक दबाबसमेत बढाएको छ। सन् २०२४ को राष्ट्रपतीय निर्वाचनका क्रममा ट्रम्पले महँगी नियन्त्रण गर्ने र अमेरिकालाई लामो सैन्य द्वन्द्वबाट टाढा राख्ने वाचा गरेका थिए।

तर इरान युद्ध छ महिनातर्फ अघि बढ्दै गर्दा पेट्रोलको मूल्यदेखि विदेश नीतिसम्मका विषयमा प्रशासन आलोचनामा पर्न थालेको छ। आगामी नोभेम्बर ३ मा हुने मध्यावधि निर्वाचनमा रिपब्लिकन पार्टीले संसद्मा रहेको झिनो बहुमत जोगाउनुपर्ने भएकाले युद्धको असर चुनावसम्म पुग्ने चिन्ता पनि बढेको छ।

सर्वेक्षणमा स्वतन्त्र मतदातालाई तत्काल संसद्को निर्वाचन भए कसलाई मतदान गर्ने भन्ने प्रश्न गर्दा ३३ प्रतिशतले डेमोक्रेट र १९ प्रतिशतले रिपब्लिकनको पक्ष लिएका छन्।

रोयटर्स/इप्सोसले देशभरका १ हजार २१५ अमेरिकी वयस्कबीच गरेको सर्वेक्षणमा करिब तीन प्रतिशत विन्दुको त्रुटि सीमा रहेको जनाइएको छ।

यसले इरान युद्धप्रति अमेरिकी समाजमा समर्थन कमजोर हुँदै गएको मात्र देखाएको छैन, युद्ध, महँगी र ऊर्जा संकटको राजनीतिक मूल्य ट्रम्प प्रशासनले समेत चुकाउनुपर्ने संकेत गरेको छ।