काठमाडौं । भोटेकोशी बाढीका कारण प्रभावित नेपाल टेलिकमका थप तीनवटा साइट पुनः सञ्चालनमा आएका छन्। मंगलबार धादिङको कल्लेरी तथा नुवाकोटका भद्रटार थप्रेक र पुसनटार साइट सञ्चालनमा ल्याइएको नेपाल टेलिकमले जनाएको छ।

कल्लेरी साइट सञ्चालनमा आएपछि आदमघाट, पिपलटार, सुनौलाबजार, घुमाउने डाँडा, कल्लेरी र बेल्टारलगायत क्षेत्रका सेवाग्राहीले पुनः दूरसञ्चार सेवा पाउने भएका छन्।

त्यस्तै, भद्रटार थप्रेक साइटबाट पञ्चकन्या, थप्रेक, महाकाली, समुन्द्रादेवी र रालुकादेवी क्षेत्र तथा पुसनटार साइटबाट पिपलटार, देवीघाट, माझीगाउँ, सिरखाली र भुवानीवेशीलगायत स्थानका सेवाग्राही लाभान्वित हुनेछन्।

बाढीका कारण प्रभावित नेपाल टेलिकमका कुल १२० साइटमध्ये अब ११३ वटा पुनः सञ्चालनमा आएका छन्। यससँगै बाढीअघि नेटवर्क सेवा उपलब्ध रहेका सबै क्षेत्रमा दूरसञ्चार पहुँच पुनः स्थापित भएको टेलिकमले जनाएको छ।

टेलिकमका अनुसार हाल आंशिक क्षमतामा सञ्चालन भइरहेका साइटहरूको क्षमता पनि क्रमशः बढाएर पूर्ण रूपमा सेवा सञ्चालनमा ल्याउने काम भइरहेको छ।