काठमाडौं । नेपाली कांग्रेसका सांसद भरतबहादुर खड्का प्रतिनिधिसभाको बैठक चलिरहेका बेला संसद् भवनभित्रै ढलेका छन्।

बिहीबार प्रतिनिधिसभाको बैठकमा राष्ट्रिय स्वतन्त्र पार्टीका सांसद सोम शर्मा बोलिरहेका बेला खड्का आफ्नै कुर्सीबाट एक्कासि ढलेका थिए। उनी ढलेपछि कांग्रेसका सांसदहरू तत्काल उठाउन पुगेका थिए।

खड्का ढलेपछि सभामुख डोलप्रसाद अर्यालले सांसद शर्मालाई केहीबेर बोल्न रोकेका थिए। केहीबेरपछि अवस्था सामान्य भएपछि सभामुखले शर्मालाई पुनः बोल्न अनुमति दिए।

संसद् सचिवालयका सहसचिव एवं प्रवक्ता एकराम गिरीका अनुसार खड्काको स्वास्थ्य परीक्षण गर्दा उच्च रक्तचाप देखिएको थियो।

संसद् सचिवालयमै प्रारम्भिक उपचार गरेपछि खड्कालाई थप स्वास्थ्य परीक्षण तथा उपचारका लागि एम्बुलेन्समार्फत वीर अस्पताल लगिएको हो।

खड्का डोटीबाट प्रतिनिधिसभामा निर्वाचित नेपाली कांग्रेसका सांसद हुन्। उनी लामो समयदेखि नेपाली कांग्रेसको राजनीतिमा सक्रिय रहँदै आएका छन्।