नुवाकोट। भोटेकोशी बाढीले नियमित खाने औषधि समेत बगाएपछि नुवाकोटका ज्येष्ठ नागरिकलाई लक्षित गरी निःशुल्क स्वास्थ्य शिविर सञ्चालन गरिएको छ।

विदुर नगरपालिका–३ सिर्खलीमा भदौ २० गते आयोजित शिविरमा २०० जनाले स्वास्थ्य सेवा लिएका छन्। तीमध्ये १०१ जना ज्येष्ठ नागरिक थिए। सेवाग्राही ज्येष्ठ नागरिकमा ४८ महिला र ५३ पुरुष रहेका छन्।

बाढीमा सुगर, प्रेसरलगायत दीर्घरोगका नियमित औषधि गुमाएका प्रभावितलाई शिविरमा स्वास्थ्य परीक्षण, विशेषज्ञ चिकित्सकीय परामर्श र आवश्यक औषधिसम्बन्धी सेवा दिइएको थियो।

शिविरमा ज्येष्ठ नागरिक रोग, मुटु, अर्थोपेडिक्स र दन्तसम्बन्धी सेवा उपलब्ध गराइएको थियो। बाढीपछि तनावमा रहेका प्रभावित परिवारलाई लक्षित गरी २५ जना ज्येष्ठ नागरिक तथा उनीहरूका परिवारका सदस्यलाई तनाव व्यवस्थापन र मनोसामाजिक परामर्शसमेत दिइएको छ।

उद्धार तथा व्यवस्थापनमा खटिएका नेपाली सेना र सशस्त्र प्रहरीका बेसलाई समेत आवश्यक केही महत्त्वपूर्ण औषधि उपलब्ध गराइएको आयोजकले जनाएको छ।