काठमाडौं । नेपाल एसीसी प्रिमियर कप क्रिकेटको सेमिफाइनलमा प्रवेश गरेको छ। साउदी अरेबियालाई ५ विकेटले पराजित गर्दै नेपाल एक खेल अगावै अन्तिम चारमा पुगेको हो।

साउदीले दिएको १९१ रनको लक्ष्य नेपालले ४१ ओभरमा ५ विकेट गुमाएर पूरा गर्‍यो। नेपालका लागि गुल्शन झा ४४, ईशान पाण्डे ४०, देव खनाल ३९ र रोहित पौडेल २४ रनमा अविजित रहे। आसिफ शेखले २० तथा अर्जुन कुमालले १५ रन बनाए।

यसअघि टस जितेर ब्याटिङ गरेको साउदी ४९.२ ओभरमा १९० रनमा अलआउट भएको थियो। उसका लागि अब्दुल वाहिदले ७७, मुहम्मद आतिफले ३० र मोहम्मद हिशाम शेखले २८ रन बनाए।

नेपालका कप्तान सन्दीप लामिछाने र दीपेन्द्रसिंह ऐरीले ३–३ विकेट लिए भने ललित राजवंशीले २ तथा गुल्शन झा र शेर मल्लले १–१ विकेट लिए।

नेपालले यसअघि बहराइनलाई ७ विकेट र आयोजक मलेसियालाई ६ विकेटले पराजित गरेको थियो। समूह चरणको अन्तिम खेलमा नेपालले मंगलबार हङकङसँग प्रतिस्पर्धा गर्नेछ।