पाल्पा । पाल्पामा पछिल्लो दुई महिनामा २५५ जनामा डेंगु संक्रमण पुष्टि भएको छ ।

स्वास्थ्य कार्यालयका अनुसार चालु आर्थिक वर्ष २०८३/८४ को साउन र भदौमा उक्त संख्यामा संक्रमण देखिएको हो ।

पछिल्ला वर्षहरूको तथ्यांक हेर्दा पाल्पामा डेंगुको संक्रमण निरन्तर उतारचढावमा रहेको देखिन्छ । आर्थिक वर्ष २०८२/८३ मा ४३२, २०८१/८२ मा ५१०, २०८०/८१ मा ६८६, २०७९/८० मा २५० र २०७८/७९ मा २४ जनामा डेंगु पुष्टि भएको थियो ।

यस वर्षको सुरुवाती दुई महिनामै २५५ जनामा संक्रमण देखिनुले पाल्पामा डेंगुको जोखिम कायमै रहेको स्वास्थ्यकर्मीले बताएका छन् । वर्षाका कारण विभिन्न स्थानमा पानी जम्ने र त्यही वातावरणमा डेंगु सार्ने एडिस जातको लामखुट्टे बढ्ने भएकाले संक्रमणको जोखिम बढ्ने उनीहरूको भनाइ छ ।

स्वास्थ्य कार्यालयका ल्याब टेक्निसियन मधुसुदन भट्टराईले जलवायु परिवर्तनका कारण वातावरणमा आएको परिवर्तनसँगै डेंगुको परीक्षण सहज भएकाले पनि संक्रमितको संख्या बढी देखिन थालेको बताए । पछिल्लो समय परीक्षणको पहुँच बढेकाले संक्रमण पहिचान हुने क्रमसमेत बढेको उनको भनाइ छ ।

युनाइटेड मिसन, पाल्पा अस्पताल, लुम्बिनी मेडिकल कलेजलगायत स्वास्थ्य संस्थामा उपचारका लागि पुगेका बिरामीमा डेंगु संक्रमण भेटिएको छ । निजी स्वास्थ्य संस्था, प्राथमिक स्वास्थ्य केन्द्र तथा स्वास्थ्य चौकीमा समेत डेंगुको परीक्षण हुने गरेको छ ।

स्वास्थ्यकर्मीका अनुसार एडिस जातको लामखुट्टेले घर वरपर थोरै मात्रामा जमेको पानीमा समेत अण्डा पार्न सक्छ । टायर, गमला, टिनका डब्बा, कुलर, फुलदानी तथा अन्य भाँडामा जमेको पानी लामखुट्टेको प्रजननस्थल बन्न सक्छ ।

लामखुट्टेको अण्डाबाट लार्भा, प्युपा हुँदै वयस्क बन्ने भएकाले पानी जम्न नदिने र लार्भा देखिनेबित्तिकै नष्ट गर्ने उपाय प्रभावकारी हुने स्वास्थ्य कार्यालयले जनाएको छ ।

संक्रमण बढेपछि स्वास्थ्य कार्यालयले डेंगु रोकथामसम्बन्धी सचेतना र अभिमुखीकरण कार्यक्रमलाई तीव्र बनाएको छ । घरआँगनदेखि सार्वजनिक स्थानसम्म सरसफाइमा ध्यान दिन र पानी जम्ने सम्भावित ठाउँ हटाउन कार्यालयले आग्रह गरेको छ ।

स्वास्थ्य कार्यालय पाल्पाका प्रमुख गौरव ढकालले लामखुट्टेको नियन्त्रणमा ध्यान दिन सके डेंगुसहित अन्य लामखुट्टेबाट सर्ने रोगको जोखिम घटाउन सकिने बताए ।

उनले लामो बाहुला भएका कपडा लगाउने, झुल प्रयोग गर्ने र घरका झ्यालढोकामा जाली राख्न सुझाव दिएका छन् । घर, कार्यालय तथा विद्यालय आसपास पानी जम्न नदिने, खाल्डाखुल्डी पुर्ने र खानेपानी वा ढल चुहावट भए तत्काल मर्मत गर्नसमेत उनले आग्रह गरेका छन् ।

गमलाको प्लेट, फुलदानी, कुलरलगायतमा पानी जम्न नदिने र त्यस्ता भाँडाको पानी कम्तीमा सातामा एकपटक फेर्न स्वास्थ्य कार्यालयले अनुरोध गरेको छ ।