काठमाडौं। प्रमुख प्रतिपक्षी नेकपा एमालेले विपत्तिको समयमा सरकार एक्लैले सबै काम गर्न सक्छु भन्ने मानसिकता नराख्न आग्रह गरेको छ।

मंगलबार प्रतिनिधिसभाको बैठकमा बोल्दै एमाले सांसद पद्मा अर्यालले बाढीपछिको उद्धार, राहत तथा व्यवस्थापनमा सरकारले अपेक्षाअनुसार काम गर्न नसकेको बताइन्।

उनले विपत्तिपछि सरकारले तत्काल सार्वजनिक आह्वान गर्दै स्वदेश तथा विदेशबाट सहयोग जुटाउनुपर्ने भए पनि त्यसमा चुकेको आरोप लगाइन्। विद्यालय तथा क्याम्पसमा रहेका इन्जिनियर र अन्य विज्ञलाई परिचालन गर्नेतर्फ पनि सरकारले पर्याप्त ध्यान नदिएको उनको भनाइ थियो।

अर्यालले विपद्का अनुभवबाट पाठ सिक्दै सरकारले तत्काल सर्वदलीय बैठक बोलाएर छलफल गर्नुपर्ने भए पनि त्यसो हुन नसकेको बताइन्।

‘विपत्तिको बेला म एक्लै काफी छु भन्ने घमण्ड नगर्नुस्,’ प्रधानमन्त्रीलाई सम्बोधन गर्दै उनले भनिन्, ‘देश र जनताको माया तपाईंलाई बढी र हामीलाई कम भन्ने हुन सक्दैन।’

सरकारले केही काम गरे पनि अझ धेरै गर्न सकिने अवस्था रहेको भन्दै उनले आगामी दिनमा सबै पक्षसँग सहकार्य गरेर विपद् व्यवस्थापनलाई प्रभावकारी बनाउन आग्रह गरिन्।