धनुषा । अविरल वर्षाका कारण पहिरो खस्दा धनुषाको मिथिला नगरपालिका–११ चुरेस्थित आँपगाछीमा एक महिलाको मृत्यु भएको छ। जिल्ला प्रहरी कार्यालय धनुषाका अनुसार पहिरोले घर पुरिँदा ३५ वर्षीया कमला श्रेष्ठको मृत्यु भएको हो।

आइतबार बिहान आँपगाछीका राजन श्रेष्ठको एकतले टालीको छानो भएको घरमाथि पहिरो खसेको थियो। पहिरो खस्दा घरभित्र पाँच जना परिवारका सदस्य रहेका थिए। उनीहरूमध्ये चार जनालाई सकुशल उद्धार गरिएको प्रहरीले जनाएको छ।

प्रहरीका अनुसार करिब ११ बजेतिर पहिरोमा पुरिएकी कमलालाई मृत अवस्थामा उद्धार गरिएको हो। लगातार वर्षा भइरहेकाले चुरे क्षेत्रका बस्तीमा पहिरोको जोखिम बढेको छ।