काठमाडौं । राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंहले पार्टीभित्र कुनै किसिमको अन्तरविरोध नरहेको दाबी गरेका छन्।

बिहीबार संसद् भवन, सिंहदरबारमा सञ्चारकर्मीसँग कुरा गर्दै सिंहले रास्वपाका नेता तथा कार्यकर्ता एकीकृत भएर अघि बढिरहेको बताएका हुन्।

सत्तापक्षमा रहे पनि संसद्मा जनताका मुद्दा र आवाज उठाउनु जनप्रतिनिधिको मुख्य दायित्व भएको उनको भनाइ छ। संसद् सरकारको पक्ष वा विपक्षभन्दा पनि जनताका समस्या राख्ने थलो भएको उनले बताएका छन्।

सिंहले जनताले ठूलो आशा र भरोसा गरेको वर्तमान सरकारलाई असफल हुने छुट नरहेको बताए। उनका अनुसार सरकार पाँच वर्षसम्म चल्ने र सफल हुने लक्ष्यका साथ आफूहरूले सहयोग गर्नेछन्।

‘सरकारलाई चौतर्फी सहयोग गरेर देशमा सकारात्मक परिवर्तन ल्याउन पाँच वर्ष नै काम गर्छौं,’ सिंहले भने।

साथै, रास्वपा सांसद सिंहले यसअघि पनि सरकारका कामकारबाहीमा सुधार आवश्यक रहेको भन्दै आफू सरकारको विरोधमा नभई सफलताका लागि खबरदारी गरिरहेको बताउँदै आएका छन्।