काठमाडौं । त्रिभुवन विश्वविद्यालयबाट उत्तीर्ण विद्यार्थीलाई ट्रान्सक्रिप्ट लिनै सास्ती छ। अनलाइनबाट आवेदन र राजस्व भुक्तानी गरे पनि प्रमाणपत्र लिन महिनौँसम्म परीक्षा नियन्त्रण कार्यालय धाउनुपर्ने विद्यार्थीको गुनासो छ।

नाम, रजिस्ट्रेसन नम्बर वा बाबुको नाममा त्रुटि भए सच्याउने प्रक्रिया झन् झन्झटिलो छ। क्याम्पस र परीक्षा नियन्त्रण कार्यालयको विवरण नमिल्दा विद्यार्थी पटकपटक कागजात बोकेर कार्यालय धाउन बाध्य छन्।

व्यवस्थापन संकायबाट स्नातकोत्तर गरेका एक विद्यार्थीले सबै विवरण बुझाइसक्दा पनि ट्रान्सक्रिप्ट नपाएको बताए। ‘सबै ठाउँमा कुरा पुर्‍याइसकियो, तर अहिलेसम्म ठोस जवाफ आएको छैन,’ उनले भने।

त्रिविले सेवा सहज बनाउन अनलाइन प्रणाली सुरु गरे पनि भौचरबाट राजस्व तिरेपछि त्यसको प्रतिलिपि लिएर परीक्षा नियन्त्रण कार्यालयमै पुग्नुपर्ने व्यवस्था कायमै छ।

जनप्रशासनमा स्नातकोत्तर गरेका दीपक ऐरले राजस्व बुझाएको नौ महिना बित्दा पनि ट्रान्सक्रिप्ट पाएका छैनन्।

त्यस्तै, पहिलो र दोस्रो वर्ष उत्तीर्ण गरेपछि ग्रेडसिटसहित उनले अघिल्लो वर्ष कात्तिक २९ गते परीक्षा नियन्त्रण कार्यालयमा आवश्यक कागजात र भौचर बुझाएका थिए। तर पटकपटक कार्यालय पुग्दा ‘बनेको छैन’ भन्दै फर्काइएको उनको गुनासो छ।

उनका अनुसार कहिले प्राविधिक समस्या, कहिले सफ्टवेयर निर्माता बिदामा रहेको र कहिले प्राविधिक बोलाउनुपर्ने भन्दै काम टारिएको थियो। समस्या लिएर उच्च अधिकारीसम्म पुगे पनि समाधान नभएको उनले बताए।

त्रिवि परीक्षा नियन्त्रण कार्यालयका अनुसार आवश्यक प्रक्रिया पूरा भएका विद्यार्थीलाई सामान्य अवस्थामा ७ देखि १० दिनमै ट्रान्सक्रिप्ट दिन सकिन्छ। तर पुराना अभिलेख, मौका परीक्षा र क्याम्पसका विवरणमा देखिएको समस्याका कारण केही विद्यार्थीको प्रमाणपत्र रोकिएको छ।

वि.सं. २०५३ देखि २०७३ सम्मका मौका परीक्षामा सहभागी केही विद्यार्थीका आवश्यक कागजात अपुग भएकाले समस्या देखिएको त्रिविको भनाइ छ।

परीक्षा नियन्त्रण कार्यालयका सहनियन्त्रक सूर्यकान्त कलौनीका अनुसार कतिपय क्याम्पसले प्रक्रिया पूरा नगरी भर्ना गराएका कारण पनि ट्रान्सक्रिप्ट रोकिएको हो।

‘कतिपय अवस्थामा प्रक्रिया पूरा नगरी क्याम्पसले भर्ना गरिदिन्छन्। मौका परीक्षा र ब्याक लागेका विषयमा समस्या देखिने गरेको छ। आवश्यक कागजात ल्याएर यसलाई सच्याउन सकिन्छ। नियमको कुरा आयो भने प्राज्ञिक परिषद्ले नै निकास दिन्छ,’ उनले भने।

ट्रान्सक्रिप्ट उपलब्ध गराइदिन माग गर्दै करिब तीन सय विद्यार्थीका निवेदन परेको परीक्षा नियन्त्रण कार्यालयले जनाएको छ। नियमसँग जोडिएका जटिल विषय भने प्राज्ञिक परिषद्बाट टुंग्याउनुपर्ने त्रिविको भनाइ छ।

त्रिवि केन्द्रीय क्याम्पसका स्ववियु सचिव हिक्मतकुमार बुढाका अनुसार पुराना अभिलेख, प्राविधिक समस्या र निर्णय प्रक्रियामा हुने ढिलाइका कारण विद्यार्थीले सास्ती खेपिरहेका छन्।

मौका परीक्षा वा विशेष परिस्थितिमा परीक्षा दिएका विद्यार्थीका जटिल विषय समयमै टुंगो नलाग्दा ट्रान्सक्रिप्ट रोकिएका छन्। पनिकाका प्रशासनिक तथा प्राविधिक समस्या समाधानमा ढिलाइ हुँदा टाढाबाट आउने विद्यार्थी झन् प्रभावित भएको उनको भनाइ छ।

अनलाइन प्रणालीबाट आवेदन र भुक्तानीको व्यवस्था भए पनि प्रमाणपत्र लिन भौतिक रूपमा कार्यालय पुग्नुपर्ने अवस्थाले त्रिविको डिजिटल सेवा अझै पूर्ण रूपमा कार्यान्वयन नभएको देखाएको छ।

पुराना अभिलेख वा नियमसँग जोडिएका जटिल विषयमा भने प्राज्ञिक परिषद्को निर्णय आवश्यक पर्ने त्रिविको भनाइ छ।