बङ्गलादेशका सेना प्रमुखले गत अगस्टमा सरकारलाई अपदस्थ गर्ने विद्यार्थी नेतृत्वको क्रान्तिको लाभ जोखिममा रहेको चेतावनी दिँदै कानून र व्यवस्थामा गिरावटका लागि मङ्गलबार अन्तरद्वन्द्वलाई दोष दिनुभएको छ ।
दक्षिण एसियाली यस राष्ट्रले हिंसात्मक अपराधमा भएको वृद्धिलाई रोक्न सङ्घर्ष गरिरहेको छ । सुरक्षा बलले यस महिना हजारौँलाई गिरफ्तार गरेको छ भने अपदस्थ प्रधानमन्त्री शेख हसिनाको पार्टीसँग सम्बन्धित गिरोहहरूलाई लक्षित गरिएको छ।
“यदि तपाईं आफ्ना मतभेदहरू नाघेर आपसमा हस्तक्षेप र लडाइँ जारी राख्नुहुन्छ भने देशको स्वतन्त्रता र अखण्डता जोखिममा पर्नेछ–– म तपाईंहरूलाई चेतावनी दिन्छु”, जनरल वाकर–उज–जमानले सेनाको स्मारक कार्यक्रममा कुनै पनि समूहको नाम नलिई भन्नुभयो, “सरोकारवालाहरू एकअर्कालाई दोष दिन व्यस्त भएकाले उपद्रवीहरूले परिस्थितिलाई अनुकूल ठान्छन् । उनीहरू विश्वास गर्छन् कि उनीहरू जे पनि गरे पार पाउन सक्छन् ।”
यस महिना भीडले हसिनाको परिवारसँग जोडिएका भवनहरू ध्वस्त पारेको भन्दै भएको विरोध प्रदर्शनका साथै बढ्दो अपराधका कारण बङ्गलादेश प्रभावित भएको छ ।
गत हप्ता विश्वविद्यालय परिसरमा प्रतिद्वन्द्वी विद्यार्थी गुटहरू बीच झडप भएको थियो । यो हसिना विरुद्धको विद्रोहलाई उत्प्रेरित गर्ने समूहहरू बीचको गम्भीर कलहको सङ्केत हो ।
सुरक्षा बलले फेब्रुअरी ८ मा ‘अपरेसन डेभिल हन्ट’ सुरु गरेदेखि आठ हजार छ सयभन्दा बढी मानिसलाई पक्राउ गरेको छ । उनीहरूमाथि सरकारले हसिनाका वफादार भएको र देशलाई ‘अस्थिर’ बनाउन चाहेको आरोप लगाएको छ ।“हामीले देखेको अराजकता हामीले निर्माण गरेका हौँ”, वाकरले भन्नुभयो ।
– एउटै चक्रमा फसेको –
बङ्गलादेशमा सैन्य कूको लामो इतिहास छ ।
हसिना अगस्ट ५ मा हेलिकप्टरबाट भारत भागेपछि वाकरले कार्यभार सम्हाल्नुभएको थियो तर उहाँले नोबेल पुरस्कार विजेता माइक्रोफाइनान्स अग्रणी मुहम्मद युनुसलाई समर्थन गर्न पनि जनतालाई आग्रह गर्नुभएको थियो ।
चौरासी वर्षीय युनुसले व्यापक लोकतान्त्रिक सुधारहरू गर्ने र सन् २०२५ को अन्त्य वा सन् २०२६ को सुरुआतमा आम निर्वाचन गर्ने वाचा गर्नुभएको छ र वाकरले अन्तरिम सरकारलाई शपथ खुवाउनुभएको थियो ।
“सुरुमा मैले चुनाव गर्न १८ महिना लाग्ने बताएको थिएँ”, सेनाप्रमुख वाकरले भन्नुभयो, “हामी त्यही मार्गमा छौँ । प्रोफेसर युनुसले हामीलाई एकताबद्ध राख्न सक्दो प्रयास गरिरहनुभएको छ । आउनुहोस् उहाँलाई सहयोग गरौँ ।”
शुक्रबार नयाँ राजनीतिक पार्टीको अपेक्षित प्रक्षेपणअघि प्रमुख विद्यार्थी आन्दोलन नेता नाहिद इस्लामले मङ्गलबार सरकारी मन्त्रिमण्डलबाट राजीनामा दिनुभयो । मन्त्रिमण्डलमा उहाँले दूरसञ्चार मन्त्रालयको नेतृत्व गर्नुभएको थियो ।
युनुसले आफूले सार्वजनिक प्रशासन र न्यायको ‘पूर्ण रूपमा बिग्रिएको’ प्रणाली विरासतमा पाएको र यसलाई भविष्यमा निरङ्कुशतामा फर्कनबाट रोक्न व्यापक सुधार आवश्यक रहेको बताउनुभएको थियो ।
वाकरले सुरक्षा बलहरूमाथि लगाइएका ‘जबरजस्ती बेपत्ता, हत्या, र यातनाका’ विभिन्न आरोपहरूको अनुसन्धान गर्नुपर्ने बताउनुभयो । “सजाय सुनिश्चित गरिनुपर्छ”, उहाँले भन्नुभयो, “अन्यथा, हामी उही चक्रमा फस्नेछौँ ।”
क्रान्तिपछि सशस्त्र बलहरूलाई प्रहरी जस्तै गिरफ्तार गर्ने लगायत न्यायिक अधिकारहरू प्रदान गरिएको थियो ।
तर लगभग चार दशकदेखि सेनामा रहनुभएका र संयुक्त राष्ट्र शान्ति सेनामा दुई पटक सेवा गर्नुभएका पेशागत पैदल सेनाका अधिकृत वाकरले केवल विश्राम चाहेको बताउनुभयो ।
“म केवल देश र राष्ट्रलाई स्थिर विन्दुमा ल्याएर बिदा लिन चाहन्छु”, उहाँले भन्नुभयो, “त्यसपछि हामी आफ्नो ब्यारेकमा फर्कनेछौँ ।”
