भारतीय प्रधानमन्त्री नरेन्द्र मोदी जुलाई २ देखि ९ सम्मको आफ्नो पाँच राष्ट्रको भ्रमण समाप्त गर्दै बिहीबार बिहान नयाँदिल्ली फर्कनुभएको छ ।

कूटनीतिक भ्रमणले घाना, ट्रिनिडाड एन्ड टोबागो, अर्जेन्टिना, ब्राजिल र नामिबियालाई समेटेको थियो र ब्राजिलको अध्यक्षतामा रियो दि जेनेरियोमा आयोजित १७औँ ब्रिक्स शिखर सम्मेलनमा उहाँको सहभागिता समावेश थियो ।

भ्रमणको पहिलो चरणमा प्रधानमन्त्री मोदी जुलाई २ मा घानाको राजधानी अक्रामा पुग्नुभएको थियो । यो ३० वर्षभन्दा बढी समयपछि कुनै भारतीय प्रधानमन्त्रीको पश्चिम अफ्रिकी राष्ट्रको पहिलो भ्रमण हो ।

आफ्नो भ्रमणका क्रममा प्रधानमन्त्री मोदीले घानाका राष्ट्रपति जोन महामासँग बलियो साझेदारीको समीक्षा गर्न र आर्थिक, ऊर्जा र रक्षा सहयोग तथा विकास सहयोगको माध्यमबाट यसलाई बढाउन थप मार्गहरूबारे छलफल गर्न द्विपक्षीय वार्ता गर्नुभयो ।

जुलाई ३ मा उहँँले ट्रिनिडाड एन्ड टोबागोको भ्रमण गर्नुभयो । प्रधानमन्त्रीका रूपमा क्यारिबियन राष्ट्रको उहाँको यो पहिलो आधिकारिक तथा सन् १९९९ पछि प्रधानमन्त्री–स्तरमा पहिलो भ्रमण हो । उहाँले आफ्ना समकक्षी कमला प्रसाद–बिसेसरलाई भेट्नुभयो र देशको संसद्लाई सम्बोधन गर्नुभयो ।

भ्रमणका क्रममा उहाँले विदेश मन्त्रालयले जारी गरेको संयुक्त विज्ञप्ति अनुसार ट्रिनिडाड एन्ड टोबागोका भारतीय डायस्पोराको छैटौँ पुस्तासम्म ओभरसिज सिटिजनसिप अफ इन्डिया (ओसिआई) कार्ड जारी गर्ने निर्णयको घोषणा गर्नुभयो ।

प्रधानमन्त्री मोदीले जुलाई ४ मा ब्युनस आयर्सको भ्रमण गर्नुभयो । त्यहाँ उहाँले अर्जेन्टिनाका राष्ट्रपति जेभियर मिलेईसँग द्विपक्षीय छलफल गरी जारी सहयोगको समीक्षा गर्नुभयो । साथै उहाँले रक्षा, कृषि, खानी, तेल र ग्यास, नवीकरणीय ऊर्जा, व्यापार, लगानी र जनता–जनता सम्बन्ध लगायत प्रमुख क्षेत्रहरूमा भारत–अर्जेन्टिना साझेदारीलाई अझ बढाउने तरिकाहरूबारे छलफल गर्नुभयो ।

प्रधानमन्त्री मोदीले जुलाई ६ देखि ७ सम्म ब्राजिलको रियो दि जेनेरियोमा भएको १७औँ ब्रिक्स शिखर सम्मेलनमा भाग लिनुभयो ।

उहाँले ब्राजिलको राजकीय भ्रमण पनि गर्नुभयो र पछि ब्रासिलियाको भ्रमण गर्नुभयो । त्यहाँ उहाँले राष्ट्रपति लुलासँग व्यापार, रक्षा, ऊर्जा, अन्तरिक्ष, प्रविधि, कृषि लगायत आपसी हितका क्षेत्रहरूमा रणनीतिक साझेदारी विस्तार गर्न द्विपक्षीय छलफल गर्नुभयो ।

ब्राजिलका राष्ट्रपति लुइज इनासिओ लुला दा सिल्भाले प्रधानमन्त्री मोदीलाई ब्राजिलको सर्वोच्च नागरिक सम्मान ’द ग्रान्ड कलर अफ द नेसनल अर्डर अफ द साउदर्न क्रस’ बाट सम्मानित गर्नुभयो ।

आफ्नो भ्रमणको अन्तिम चरणमा प्रधानमन्त्री मोदीले नामिबियाको भ्रमण गर्नुभयो ।