युक्रेनलाई सहयोग जारी राख्न र युरोपेली राष्ट्रहरूसँगै सहकार्य गर्न जर्मन चान्सलर फ्रेडरिक मर्जले अमेरिकी राष्ट्रपति डोनल्ड ट्रम्पलाई आग्रह गर्नुभएको छ ।

रोममा आयोजित एक अन्तर्राष्ट्रिय सम्मेलनमा मर्जले ‘वासिङ्टन डिसी र राष्ट्रपति डोनाल्ड ट्रम्पलाई सङ्केत गर्दै भन्नुभयो, “हामी(युरोपेली राष्ट्रहरू) सँग रहनुहोस्, हामी एउटै पृष्ठमा छौं र हामी यस संसारमा स्थिर राजनीतिक व्यवस्थाको खोजीमा छौं ।”

उहाँले भन्नुभयो, रुसी राष्ट्रपति भ्लादिमिर पुटिनलाई सङ्केत गर्दै भन्नुभएको छ, “हामी हार मान्दैनौँ ।”

युक्रेनको पुनर्निर्माणका लागि राजनीतिक र निजी क्षेत्रको समर्थन जुटाउने उद्देश्यले आयोजित ‘युक्रेन पुनरूत्थान सम्मेलनमा मर्जले उक्त कुरा बताउनुभएको हो ।

गत जनवरीमा ट्रम्पले पदभार ग्रहण गरेदेखि नै किएभलाई दिइएको अमेरिकी समर्थनमाथि प्रश्न उठाइएको थियो । अमेरिकी राष्ट्रपति ट्रम्पले शान्ति सम्झौता गर्ने प्रयासमा मस्कोसँग निकटता देखाउनुभएको थियो ।

यद्यपि यसै साता ट्रम्पले आफ्ना रुसी समकक्षी भ्लादिमिर पुटिनले युक्रेनबारे ‘धेरै बकवास’ गरिरहेको बताउनुभएको थियो ।

ट्रम्पले युक्रेनलाई थप हतियार पठाउने घोषणा गरेको एक दिनपछि ट्रम्पको आलोचना भएको थियो, गत हप्ता वासिङ्टनले केही हतियार ढुवानी रोक्ने घोषणालाई उल्ट्याएको थियो ।

मर्जले किएभलाई इयूको समर्थन ’अटुट’ रहेको बताउँदै रुसविरुद्ध प्रतिबन्धको नयाँ प्याकेज तयार गरिरहेको उल्लेख गर्नुभयो ।

उहाँले भन्नुभयो, “एउटा मात्र सदस्य राष्ट्र यसमा सहमत हुन सकेको छैन । म स्लोभाकिया र त्यहाँका प्रधानमन्त्रीलाई तत्काल प्रतिरोध त्याग्न आग्रह गर्दछु ।”

स्लोभाकियाका प्रधानमन्त्री रोबर्ट फिको आफ्नो रुसी समर्थक अडानका लागि चिनिनुहुन्छ र मे महिनामा मस्कोको दोस्रो विश्वयुद्धको सम्झनामा भाग लिने एक मात्र इयू नेता हुनुभएको थियो । उक्त अवसरमा उहाँले रूसी राष्ट्रपति पुटिनलाई भेट्नुभएको थियो ।