इरानले अन्तर्राष्ट्रिय आणविक ऊर्जा एजेन्सी (आइएइए)सँगको सहकार्यले ‘नयाँ रूप लिने’ शनिबार बताएको छ ।

आफ्नो आणविक कार्यक्रमसम्बन्धी चिन्तासमाधानका लागि कूटनीतिक समाधानको चाहना व्यक्त गर्दै इरानले उक्त धारणा सार्वजनिक गरेको हो ।

गत महिना इजरायलले इरानविरूद्ध हवाई आक्रमण गरेपति दुई देशबीच १२ दिन युद्ध भएको थियो । इजरायली बमबारी अभियानले सैन्य र आणविक स्थलका साथै आवासीय क्षेत्रमा आक्रमण गरेपछि संयुक्त राष्ट्रसङ्घको आणविक निगरानी निकायसँग उसको पहिलेदेखि नै अस्थिर सम्बन्ध बिग्रिएको थियो ।

तेहरान र वासिङ्टनबीच आणविक वार्तालाई पुनर्जीवित गर्ने उद्देश्यले तय गरिएको बैठकको केही दिनअघि उक्त आक्रमण सुरु भएको थियो ।

इरानका विदेशमन्त्री अब्बास अराघचीले आइएइएसँग इरानको सहकार्य ‘नरोकिएको तर नयाँ रूप लिने’ बताउनुभएको छ ।

इरानलाई आणविक हतियार विकास गर्नबाट रोक्नका लागि इजरायलले सुरु गरेको युद्धमा इरानले गत जुनमा आफ्नो आणविक केन्द्रहरूमा भएको आक्रमणका लागि आइएइएलाई जिम्मेवार ठहर्‍याएको छ ।

गत अप्रिल १२ देखि इरानसँग वार्तामा रहेको संयुक्त राज्य अमेरिकाले पनि गत जुन २२ मा फोर्डो, इस्फाहान र नातान्जस्थित इरानी आणविक केन्द्रलाई लक्षित गरी आक्रमण गरेको थियो ।

अराघचीले आणविक स्थलको अनुगमनका लागि गरिएको अनुरोधलाई सुरक्षा मुद्दाहरूलाई ध्यानमा राख्दै ‘हरेक घटनाका आधारमा पुनरावलोकन गरिने’ र इरानको सर्वोच्च राष्ट्रिय सुरक्षा परिषदद्वारा व्यवस्थित गरिने बताउनुभयो ।

तेहरानले सहयोग रोकेपछि जुलाईको सुरुमा आइएइए निरीक्षकहरूको एक टोली इरानबाट भियनास्थित सङ्गठनको मुख्यालयतर्फ फर्किएको थियो ।

आर्थिक प्रतिबन्ध हटाउने बदलामा इरानको आणविक गतिविधिलाई नियमन गर्ने उद्देश्यले वार्ता भएको थियो ।