काठमाडौँ । एमालेको दोस्रो विधान महाधिवेशनको तयारी तीव्र पारिएको छ। महाधिवेशन आउन सात दिन मात्र बाँकी छँदा तयारीलाई तीव्र पारिएको हो।

पार्टी केन्द्रीय कार्यालय च्यासल, ललितपुरमा आज महाधिवेशन तयारीका लागि केन्द्रीय जनसङ्गठन समन्वय संयन्त्रको बैठक सम्पन्न भएको छ।

बैठकमा संयन्त्रका संयोजक भानुभक्त ढकालले हालसम्मको काम र बाँकी तयारीबारे ‘ब्रिफिङ’ गरे। उनले आसन्न दोस्रो विधान महाधिवेशनलाई लक्ष्य गर्दै जनसङ्गठनहरूको सक्रिय भूमिका सुनिश्चित गर्नुपर्नेमा जोड दिए।

बैठकमा महाधिवेशनलाई सफल बनाउन सङ्गठनात्मक तयारी, प्रचारप्रसार, मिडिया सेन्टर स्थापना, स्वयंसेवक व्यवस्थापन, सबै जनसङ्गठनहरूको व्यापक सहभागिताका विषयमा छलफल गरिएको संयोजक ढकालले जानकारी दिए। उनले विधान महाधिवेशन एमालेको नीति र सङ्गठनात्मक यात्रामा महत्त्वपूर्ण मोड भएको भन्दै सबै जनसङ्गठनका प्रतिनिधिहरूलाई सक्रिय रहन आग्रह गरे। बैठकमा एमालेका सबै जनसङ्गठनका अध्यक्ष र इञ्चार्जको सहभागिता थियो।

विधान महाधिवेशन आगामी भदौ २० देखि २२ सम्म ‘निर्णायक राष्ट्रिय शक्ति निर्माण हाम्रो सङ्कल्प, समृद्ध नेपाल सुखी नेपाली राष्ट्रिय गन्तव्य १’ भन्ने मूल नारासहित ललितपुरको गोदावरीस्थित सनराइज सम्मेलन केन्द्रमा हुँदै छ।