काठमाडौँ, १४ भदौः राष्ट्रियसभाका उपाध्यक्ष विमला घिमिरेले सहकारीलाई दिगो र विश्वासिलो बनाउन चुनौतीको सामना गरेर अगाडि बढ्न आग्रह गर्नुभएको छ ।

महिलाहरूकै नेतृत्व र व्यवस्थापनमा सञ्चालन भएको अक्षयकोष बचत तथा ऋण सहकारी संस्थाको १५औँ साधारणसभाको आज यहाँ उद्घाटन गर्दै उहाँले सहकारी क्षेत्रमा देखिएका समस्या र चुनौतीलाई सामना गरेर मात्रै सहकारीलाई दिगो र विश्वासिलो बनाउन सकिने बताउनुभयो ।

उपाध्यक्ष घिमिरेले सहकारी भनेको वित्तीय संस्था मात्र नभई आत्मनिर्भरता, सहकार्य र साझा समृद्धिको आधारस्तम्भ पनि भएको उल्लेख गर्नुभयो । “सहकारी समृद्धिका आधार पनि हुन्, तर यो क्षेत्र पूर्णतयाः समस्यामुक्त छैन । पछिल्ला केही वर्षमा सहकारी क्षेत्रमा चुनौतीहरू गहिरिँदै गएका छन्, यी चुनौतीहरूलाई समाधान नगरी हामीले सहकारीलाई दिगो र विश्वासिलो बनाउन सक्दैनौँ । त्यसैले समस्या समाधानका गम्भीर बन्न आवश्यक छ ।”

सहकारी आन्दोलन नेपालको आर्थिक, सामाजिक र सांस्कृतिक रुपान्तरणमा एउटा शक्तिशाली माध्यम भएको बताउँदै उपाध्यक्ष घिमिरेले पछिल्लो समय सहकारीले सदस्यको बचतलाई उत्पादनमुखी क्षेत्रमा भन्दा पनि छिटो नाफा देखिने जोखिमयुक्त क्षेत्रमा लगानी गर्ने प्रवृत्ति बढेकामा चिन्ता व्यक्त गर्नुभयो । उहाँले यस्तो प्रवृत्तिले सहकारीलाई बदनाम र सहकारी अभियानलाई नै विफल बनाउने अवस्था आइपुगेकाले सहकारी विभाग, स्थानीय तह र अन्य नियामक निकायबीच आवश्यक समन्वय र सूचनाको आदान–प्रदान गरेर समस्या समाधान गर्न आग्रह गर्नुभयो ।

उपाध्यक्ष घिमिरेले सहकारी क्षेत्रलाई संसद्ले आवश्यक कानुन बनाउन, नीतिगत मार्गनिर्देशन गर्न र कार्यान्वयनमा निरन्तर अनुगमन गर्न भूमिका खेल्ने विश्वास दिलाउनुभयो । महिला नेतृत्वमा सञ्चालित सहकारी संस्थाहरूलाई सबल र प्रभावकारी बनाउनका लागि संसद् निरन्तर साथमा हुने उहाँको भनाइ थियो ।