काठमाडौं । चिकित्सा शिक्षा सुधारका अभियन्ता डा. गोविन्द केसीले मन्त्री चयनका लागि भन्दै भइरहेको अनलाइन मतदानबाट आफ्नो नाम हटाउन आग्रह गरेका छन् । जेनजी समूहले प्रधानमन्त्री सुशीला कार्की नेतृत्वको मन्त्रिपरिषद्मा स्वास्थ्यमन्त्री बनाउने भन्दै डा. केसीको नाम पनि समावेश गरेका थिए । यपछि डा. केसीले अन्तरिम सरकारको मन्त्रीहरू छान्न केही समूहले आफ्नो नाम राखेर मतदान गरिरहेको भन्दै हटाउन आग्रह गरेका हुन् ।

डा. केसीले नव युवापुस्ताको आन्दोलनको समाप्तिपछि गठन भएको अन्तरिम सरकारमा प्रधानमन्त्री कार्कीको नियुक्तिले यस संक्रमणकाललाई तार्किक निष्कर्षमा पु¥याउने अपेक्षा लिएको पनि विज्ञप्तिमा बताएका छन् । ‘त्यस सरकारमा अन्य मन्त्रीहरू छान्न केही समूहले अनलाइन मतदान गरिरहेको भन्ने मेरो जानकारीमा आएको छ । कुनै पनि पद तथा ओहोदामा मेरो न पहिला आकांक्षा थियो, न अहिले छ र न भविष्यमा नै हुनेछ तसर्थ मेरो नाम मन्त्रिपरिषदको सदस्यका लागि भइरहेको अनलाइन भोटिङबाट हटाउन सम्बन्धित पक्ष लगायत सबैलाई अनुरोध गर्दछु,’ विज्ञप्तिमा छ ।