काठमाडौं । पृथ्वी राजमार्गको मुग्लिन–आँबुखैरेनी सडकखण्डको डम्पिङ साइड नजिकै सडक भासिएको छ । मर्मत सकिन लागेको सडक भासिएको हो ।

यसअघि पनि यहाँ सडक भासिएको थियो । भासिएको सडक मर्मत गरिनसक्दै लगातारको झरीपछि आज शनिबार फेरि भासिएको छ । पहिरो भासिएसँगै यहाँनिर सवारी एकतर्फी सञ्चालन भएको इलाका प्रहरी कार्यालय आँबुखैरेनीले जानकारी दिएको छ ।

चितवन भएर जाने राजमार्गमा सवारी चलाउन रोक
चितवन भएर जाने राजमार्गमा सवारी चलाउन रोक लगाइएको छ । जिल्ला प्रशासन कार्यालय, चितवनमा बसेको सुरक्षा, होटल व्यवसायी संघ (हान) र सरोकारवालाको बीचमा भएको बैठकले यस्तो निर्णय गरेको हो ।

अर्को सूचना जारी नभएसम्मका लागि सवारी आवागमनमा रोक लगाउने निर्णय भएको हो । बाहिरी जिल्लाबाट चितवन आइपुगेर अलपत्र परेका यात्रुलाई चितवनका होटलमा नियमित शुल्कमा ७५ प्रतिशत छुट दिएर भरतपुर, नारायणगढ र सौराहाका होटलमा बस्ने व्यवस्था मिलाइएको पनि जानकारी गराइएको छ । जसका लागि ९८५५०१४१८० मा सम्पर्क गर्न प्रशासनले भनेको छ ।