काठमाडौं । नेकपा एकीकृत समाजवादीले माओवादी केन्द्रसँग एकता गर्ने निर्णय गरेपछि असहमति जनाएका नेताहरु पार्टी पुनर्गठनको बहसमा जुटेका छन् । नेकपा एकीकृत समाजवादीका पोलिटब्युरो सदस्य धर्म निरौला अब सम्मानित नेता झलनाथ खनाल पनि नेतृत्वबाट बिदा हुनुपर्ने बताएका छन् ।

अध्यक्ष माधव नेपाल पक्ष माओवादी केन्द्रसँग एकतामा जाने भएपछि असहमति जनाउँदै बसेका सम्मानित नेता झलनाथ खनाल पक्ष पार्टी पुनर्गठनको बहसमा जुटेको हो । अध्यक्ष नेपाल नै माओवादी केन्द्रसँग एकता गर्ने गरी छुट्टिएपछि अहिले नेकपा एसको अबको नयाँ नेतृत्वका विषयमा पनि छलफल सुरु भएको छ । माधव नेपालपछि सम्मानित नेता झलनाथ खनाल भए पनि अब पार्टी पुनर्गठनका बेला उनी संरक्षकको भूमिकामा रहनु पर्ने पनि चर्चा सुरु भएको छ ।

माओवादीसँग एकता गर्ने निर्णयपछि अलगै पार्टी बनाउन भएको भेलाअघि सञ्चारकर्मीहरूसँग कुरा गर्दै नेकपा एसका पोलिटव्यूरो सदस्य धर्म निरौलाले अब नेतृत्व महासचिव घनश्याम भुसालले गर्नुपर्ने बताए । नेता खनाल संरक्षक भएर बसेर महासचिव भुसाल संयोजक हुनुपर्ने उनको भनाइ छ ।

उनले भने, ‘हामी यही पार्टीलाई पुनर्गठन गरेर जान्छौं । सबै कम्युनिष्ट पार्टी पुनर्गठनको अभियान चलाउँछौं र मिल्दै जान्छौं । अहिले हामी माधवजीहरूसँग अलग भएका छौं । अब एक साताभित्र राष्ट्रिय कार्यकर्ता भेला गरेर हाम्रो दृष्टिकोण सार्वजनिक गर्छौ ।’ उनले अध्यक्ष माधव नेपाललाई भ्रष्टाचारको मुद्दा लाग्दा इच्छाएको व्यक्तिलाई कार्यवाहकको जिम्मेवारी दिन आफूहरूले भन्दा समेत नमानेको उनले बताएका छन्।