काठमाडौं । निवर्तमान प्रधानमन्त्री समेत रहेका नेकपा (एमाले) का अध्यक्ष केपी शर्मा ओलीले सुशीला कार्की नेतृत्वको सरकारलाई असंवैधानिक, प्रतिगामी र अराजक प्रवृत्तिबाट जन्मिएको सरकारको संज्ञा दिएका छन् । एमाले शिक्षा तथा मानवस्रोत विभागले शुक्रबार काठमाडौंमा आयोजना गरेको ‘केपी ओलीसँग अन्तर संवाद’ कार्यक्रममा बोल्दै उनले पूर्व प्रधानन्यायाधीश कार्कीले संविधान विपरीत प्रधानमन्त्री बनेको आरोप लगाए ।

ओलीका अनुसार संविधानले पूर्व प्रधानन्यायाधीशलाई कुनै पनि सरकारी जिम्मेवारी लिन निषेध गरेको भए पनि कार्कीले सो सीमालाई तोड्दै सत्ता सम्हालेकी हुन् । उनले भने, ‘कुनै संविधानले प्रधानन्यायाधीशलाई प्रधानमन्त्री बन्न दिने कुरा गरेको छैन । मानव अधिकार आयोग बाहेक अन्य कुनै पदमा जान मिल्दैन भन्ने प्रावधान छ । त्यसो हुँदा पनि संविधान मिचेर प्रधानमन्त्री बन्नु प्रतिगमनको पराकाष्ठा हो ।’

डिस्कर्डमार्फत प्रधानमन्त्री चयन भएको भनाइप्रति व्यङ्ग्य गर्दै ओलीले भने, ‘के सभ्य समाजमा डिस्कर्डबाट प्रधानमन्त्री छानिन्छ ? दुई–तीन हजार केटाकेटीले डिस्कर्डमा भोट हाले र त्यसलाई सरकार मान्ने ? कसले गन्यो त्यो मत ? कस्तो मतपत्र थियो ?’ उनले त्यस किसिमको प्रक्रियालाई ‘हावाको भरको हाहुको सरकार’ भनेर टिप्पणी गरे । ओलीले अराजक आन्दोलन र आगजनीको भरमा बनेको सरकारले लोकतन्त्र, संविधान र संसदप्रति वैरभाव देखाएको आरोप पनि लगाए । उनले भने, ‘२४ गतेको आगजनी र तोडफोडपछि बनेको सरकार न जनअनुमोदनबाट बनेको हो, न संविधानअनुसार । यो लोकतान्त्रिक प्रणाली र प्रक्रियासँग वैमनस्य राख्ने, प्रतिनिधिसभाको अस्तित्वलाई चुनौती दिने सत्ता हो ।’

राजतन्त्रकालीन प्रतिगमन देख्न सकिने भए पनि अहिलेको प्रतिगमन ‘अदृश्य र आधारहीन’ भएको उनको भनाइ थियो । ‘यी प्रतिगमनकारी न इतिहासमा छन्, न परम्परामा, न जनसमर्थनमा । हाहुमा आगो लगाउने, तोडफोड गर्ने, अराजक अभ्यास गर्नेहरूको भरमा बनेको सरकार देशका लागि खतरा हो’, उनले चेतावनी दिए । ओलीले अन्त्यमा एमालेले अराजकताका यी अभ्यासहरूविरुद्ध दृढतापूर्वक प्रतिवाद गर्ने स्पष्ट सन्देश दिएका थिए ।