काठमाडौं । नेकपा एमालेका नेता महेश बस्नेतले जेनजीहरु गृहमन्त्री ओमप्रकाश अर्याललाई आफूहरुसँगै भएको कार्यक्रममा समेत फोन गर्दै गाली गर्ने र गृहमन्त्रीलाई निरीह बनाइएको दाबी गरेका छन् । बस्नेतले त्यो क्रियाकलापले राज्यको नेतृत्व र सुशासनप्रति गम्भीर प्रश्न उठाएको बताएका छन् । आज (आइतबार) आयोजित एक कार्यक्रममा बोल्दै बस्नेतले जेनजीहरु कहिलेकाहीँ मुख ढाकेर (क्याप, मास्कलगायत) मा उपस्थित हुने र ‘हामी गम्भीर संकटमा छौं’ भने जस्ता प्रतिक्रियासहित व्यवहार गर्ने गरेको देखिएको उनले बताए ।

उनले भने, ‘कोठाभित्र पनि क्याप, मास्क लगाएर बस्नु हुन्छ । मास्क खोले हुन्छ नि भन्दा हामी गम्भीर संकटमा छौं भन्नु हुन्छ । यति आतंकित बनाइएको छ बिचराहरूलाई ।’ बस्नेतले भने, ‘हाम्रै अगाडि फोन गर्नु हुन्छ । यस्तो गाली दिनुहुन्छ कि निरीह छन् बिचरा । फेरि उनको एसएमएस आउँछ । के भद्र खनाल रे ? अजय भद्र खनाल । विवेकशील पार्टीका नेता । उहाँलाई कन्ट्याक्ट गर्नुस्, खास योजना बनाउनुस्, बालेन र सुधन गुरुङ अति भएका छन्, उनीहरूलाई तह लगाउनुस् भनेर आउँछ म्यासेज । जेनजीले दाइ हेर्नुस् भनेर मलाई देखाउँछन् । मेरो आवाज अलि पुगेन, केपी ओली र महेश बस्नेतलाई थुन्नपर्छ भनेर माग गर्नुस् पनि भन्दा रहेछन् । यस्ता लठ्याङ्ग्रे गृहमन्त्री भएका देशमा सुशासनको आशा गर्ने ?’ उनले भने ।

बस्नेतले जेनजीहरुसँग सम्बन्धित समूहहरूले शेरबहादुर देउवा र यस पार्टीका वरिष्ठ नेताहरू विरुद्ध ‘गम्भीर घाइते पार्ने’ तथा केपी ओलीलाई ‘सिध्याउने’ योजना बनाएको समेत दाबी गरे । उनले भने, पाँच मिनेट ढिला भएको भए ओली जोगिनु हुन्थेन ।’ बस्नेतले आफूमाथि मात्र नभएर अध्यक्ष ओलीमाथि समेत आपराधिक योजना बनाइएको र उनीहरुलाई ‘गुण्डुमा राखेपछि’ पछि पनि योजनाहरू तयार पारिएको बताए ।

बस्नेतले असोज ११ को घटना (आन्दोलन-घटनाको सन्दर्भ) लाई ‘चियापान’ नभएर प्रतिरोधका रुपमा व्याख्या गरे । उनले भने, ‘हामी दशैं, तिहार, चियापन गरेर खुशी मनाउने मुडमै थियौँ भनेर होइन; तर हामीलाई मार्न आउँछन् भनेर योजना बनाउनेहरुका विरुद्ध हामीले प्रतिक्रिया देखायौँ ।’ उनले उक्त दिन विशेष उद्देश्यले गरिएको कार्यक्रमले केही व्यक्तिहरु (लुसिफर) लाई लक्षित गर्ने संकेत दिइएको थियो, तर उनीहरू उपस्थित नभएको पनि बताए ।