काठमाडौं । नेपाली कांग्रेसका नेता डा. मिनेन्द्र रिजालले चुनावसम्म पार्टी चलाउन र टिकट वितरण गर्ने जिम्मा दुई महामन्त्रीलाई दिन प्रस्ताव गरेका छन् । दुई महामन्त्री गगन थापा र विश्वप्रकाश शर्मा तथा उनीहरूका समर्थकहरूले चुनावमा ‘टिकट बेच्न’ का लागि संस्थापन पक्षका नेताहरूले महाधिवेशन गर्न नचाहेको भन्ने भाष्यप्रति संकेत गर्दै यस्तो प्रस्ताव गरेका हुन् ।

उनले चुनाव जिताए थप हाइ हाई हुने र १५-२० वर्ष पार्टी हाँक्ने जिम्मा पनि उनीहरूले नै पाउने बताए । ‘संस्थापन पक्षका बुढा नेताहरू, तपाईंहरू साइड लागिदिनुस्, चुनावमा टिकट बेच्नका लागि पस्नु भएको भन्ने छ तपाईंहरू हात झिकिदिनुस्’, केन्द्रीय समितिको बैठकमा रिजालले भने, ‘चुनावसम्म अबको चार महिना पार्टी चलाउने जिम्मा महामन्त्रीद्वयलाई दिउँ, टिकट पनि उहाँहरूले नै बाँड्नु हुन्छ, चुनाव पनि उहाँहरूले नै जिताउनु हुन्छ ।’

चुनाव जिताए त्यसको श्रेय लिँदै महामन्त्रीहरूकै नेतृत्वमा पार्टी जाने र सफल बनाउन नसके बिदा लिनुपर्ने बताए । महामन्त्री समर्थकहरूले संस्थापन पक्षका सात भाइ नेताहरूले चुनावमा टिकट बेच्नका लागि महाधिवेशन गर्न नचाहेको आरोप लगाउने गरेका छन् । महाधिवेशनका पक्षमा भन्दै गरिएका भेलाहरूमा अधिकांश नेताहरूको आरोप सात भाइले टिकट बेच्नका लागि महाधिवेशन टार्न खोजेको भन्ने हुन्छ ।

सोमबार नयाँ बानेश्वरमा भएको अन्तरक्रियामा त तपाईंहरूले पनि टिकट बेच्नकै लागि चुनावअघि महाधिवेशन भन्नु भएको हो भन्दै प्रश्न उठेको थियो । त्यस क्रममा महाधिवेशन पक्षधर नेताहरूले आफूहरूले टिकट बेच्ने प्रवृत्ति नै अन्त्य गर्न लागेको जवाफ दिएका थिए ।

अर्का नेता रमेश लेखकले भने महामन्त्री थापा र संस्थापन पक्षले पेश गरेको कार्यतालिकामाथि छलफल गर्दै नयाँ विकल्प निकाल्नुपर्ने बताए ।रिजालको प्रस्तावमाथि घुमाउरो असहमति जनाउँदै उनले मध्यमार्गी बाटो अपनाउनु पर्नेमा जोड दिएका हुन् ।

महामन्त्री थापाले पुस १६ देखि १९ गतेसम्मको कार्यातालिका र सहमहामन्त्री महेन्द्र यादवले बैशाख २७ देखि ३० गतेसम्मको कार्यतालिका पेश गरेका थिए । त्यसप्रति लेखकले भने, ‘विशेष महाधिवेशनका लागि गरिएको हस्ताक्षर फिर्ता गरौँ । दुई वटा क्यालेन्डर आएको छ, दुई वटै क्यालेन्डरलाई मिलाएर एउटा क्यालेन्डर बनाएर जाउँ ।’ असोज २८ गतेदेखि शुरु भएको काँग्रेस बैठक अझै सकिएको छैन ।