काठमाडौं । नेकपा एमालेका वरिष्ठ उपाध्यक्ष ईश्वर पोखरेलले सचिवालय बैठकमा भावी अध्यक्षमा दाबी प्रस्तुत गर्दै प्रतिस्पर्धा गर्न तयार रहेको जानकारी गराएका छन् ।

बिहीबार बसेको सचिवालय बैठकमा उनले केपी ओलाई अहिलेको कार्यकालपछि बिदा हुन आग्रह गर्दै आफू अध्यक्ष लड्ने जानकारी गराएका हुन्। पोखरेलले  आफू जुनसुकै हालतमा पनि नेतृत्वमा लड्ने बताउँदै ओलीलाई अभिभावकत्व भइदिन समेत आग्रह गरे।

ओलीले ११औँ महाधिवेशनलाई एकताको महाधिवेशन बनाउन आग्रह गरे  । ओलीले नेतृत्व सर्वसम्मत चयन गरौँ भन्दै नत्र स्वस्थ प्रतिस्पर्धाका लागि तयार रहेको बताए ।

झलनाथ, माधव, भीम रावलहरूको उदाहरण दिँदै ओलीले विगतमा प्रतिस्पर्धाबाट हारेकाहरूले टुटफुट र पार्टी विभाजनसम्मको गतिविधि गरेको उदाहरण दिँदै एकढिक्का भएर जानुपर्ने अहिलेको अवस्थामा त्यस्तो नहोस् भन्दै सचेत गराएका छन् ।

“कसैले प्रतिस्पर्धा गर्नुहुन्छ भने पनि स्वस्थ प्रतिस्पर्धा गर्न सकिन्छ भन्ने कुरा बैठकमा छलफल भएको छ,” उपमहासचिव प्रदीप ज्ञवालीले भने ।

नेकपा एमालेको ११औं महाधिवेशन यही २७ गतेदेखि काठमाडौँमा हुँदैछ। तेस्रोपटक अध्यक्षमा दोहोरिन लागेका ओली कुनै पनि हालतमा नेतृत्व छोड्ने अवस्थामा छैनन्।