`

एनपिएलले विदेशी खेलाडीबाट सिक्ने मौका मिलेको छः रञ्जित कुमार

Nepal One HD ११ मंसिर २०८२ ७:३३
खेलकुद

काठमाडौँ- नेपाल प्रिमियर लिग (एनपिएल)मा चितवन राइनोजका रञ्जित कुमारले विदेशी खेलाडीबाट सिक्ने मौका जुरेको बताउनुभएको छ । बुधबार सम्पन्न खेलमा विराटनगर किङ्सलाई ४८ रनले पराजित गरेपछि रञ्जितले सञ्चारकर्मीसँगको कुराकानीमा यस्तो बताउनुभयो ।

उहाँले भन्नुभयो, “विदेशी खेलाडीसँग खेल्न पाउँदा हामीले धेरै सिक्ने मौका मिलेको छ । खेल्ने क्रममा केही कमजोरी भए पनि विदेशी खेलाडीले पनि सम्झाउनुहुन्छ । राम्रो सल्लाह दिनुहुन्छ ।”

कुमार डेब्यु खेलमै पाँच विकेट लिने पहिलो खेलाडीसमेत बन्नुभएको छ । टोली कप्तान कुशल मल्लले ढुक्कसँग बलिङ गर्न हौसला दिएको बताउँदै उहाँले आफूले पाएको अवसरमा राम्रो गरेर देखाउनुपर्छ भन्ने लागेको प्रतिक्रिया दिनुभयो । कुमारले भन्नुभयो, “मैदानमा आउदादेखि नै आज राम्रो गर्छु भन्ने आत्मविश्वास बढेको थियो । बलिङ मात्रै नभएर फिल्डिङमा पनि राम्रो गर्छु भन्ने विश्वास थियो ।”

बुधबार सम्पन्न विराटनगर किङ्ससँगको खेलमा उहाँले चार ओभरमा २१ रन खर्चेर पाँच विकेट हात पार्नुभयो । १९ वर्षीय देब्रे हाते स्पिनर बलर रहेका रञ्जितको उत्कृष्ट प्रदर्शनमा अपराजित विराटनगर किंग्सको यात्रामा ब्रेकसमेत लाग्यो । उहाँ ‘प्लेयर अफ दी म्याच’ समेत हुनुभयो ।

लगातार तीन खेल जितेको विराटनगर आज चौथो खेलमा चितवनसँग पराजित भयो । पराजित भएपछि विराटनगरका प्रशिक्षक धम्मिका प्रसादले ब्याटिङ नचल्दा पराजित हुनुपरेको बताउँदै आगामी खेलमा पुनरागमन गर्ने बताउनुभयो । उहाँले नेपाली क्रिकेटको प्रशंसा गर्दै एनपिएल नवयुवा खेलाडीका लागि राम्रो प्लेटफर्म रहेको धारणा व्यक्त गर्नुभयो ।


प्रतिक्रिया

Leave a Reply

Your email address will not be published. Required fields are marked *