काठमाडौं । नागरिक उड्डययन प्राधिकरण (क्यान) का महानिर्देशक प्रदीप अधिकारीसहित सात जनाविरुद्ध विशेष अदालतमा मुद्दा दर्ता भएको छ । अख्तियार दुरुपयोग अनुसन्धान आयोगले १३ करोड ५७ लाख रुपैयाँ बिगो कायम गर्दै मुद्दा दायर गरेको विशेष अदालत स्रोतले जानकारी दिएको छ । सात जनालाई प्रतिवादी बनाइएकोमा अधिकारी र पूर्व निर्देशक मुरारी भण्डारी मात्रै पक्राउ परेका छन् । अन्य ५ जना फरार छन् । अधिकारी र भण्डारीलाई भने थुनामै राखेर मुद्दा थुनछेक गर्ने अख्तियारको तयारी छ ।

विशेष अदालतले थुनामै राख्न अनुमति दिए उनीहरूले हिरासतमा बस्नुपर्नेछ । यसअघि अनुसन्धान गर्दा भने अख्तियारले तारेखमा राखेर बयानलगायतका प्रक्रियाअगाडि बढाएको थियो । तारेख बुझ्नकै लागि बुधबार अख्तियार पुगेका उनीहरूलाई पक्राउ गरेर अभियोग पत्रका साथ विशेष अदालतमा लगिएको हो । भक्तपुरको नलिनचोकस्थित हेलिप्याड निर्माणमा भ्रष्टाचार गरेको अख्तियारको आरोप छ ।

विदेश उड्न खोज्दै गर्दा समातिए अधिकारी
प्राधिकरणका महानिर्देशक अधिकारी विदेश उड्ने तरखरमा रहेकै बेला अख्तियारको टोलीले पक्रेको पाइएको छ । आयोगबाट खटिएको टोलीको नेतृत्व गर्दै नेपाल प्रहरीका एसपी मोहन थापाले उनलाई नियन्त्रणमा लिएको बताइन्छ । पोखरा, भैरहवामा निर्मित विमानस्थलमा भ्रष्टाचार गरेको आरोपमा अख्तियारले अनुसन्धान जारी राखेकै बखत उनी अर्कै काण्डमा तानिएका हुन् । हिजो मात्रै ‘हामी नेपाल’ का संयोजक तथा प्रधानमन्त्री कार्कीका अति निकट भनेर चिनिएका सुधन गुरुङलाई समेत अधिकारीले भेटेको स्रोतको दाबी छ ।

अख्तियारमा भइरहेको अनुसन्धान रोक्न र कुनै हालतमा पक्रनबाट रोक्न उनले अन्तिम समयमा गुरुङ च्यानललाई समेत प्रयोग गरेको उच्च स्रोतले बतायो । यसअघि हेलिपोर्ट निर्माणमा भएको भ्रष्टाचारबारे अख्तियारले तत्कालीन पर्यटनमन्त्री जीवनराम श्रेष्ठसँग बयान लिएको थियो । अख्तियारमा भइरहेको अनुसन्धानलाई रोक्न अधिकारीले यसअघिका अधिकांश सरकार, ठूला राजनीतिक दलका नेतालाई प्रभावमा पारेका थिए । हिजो मात्रै हामी नेपालका संयोजक तथा प्रधानमन्त्री कार्कीका अति निकट भनेर चिनिएका सुधन गुरुङलाई समेत अधिकारीले भेटेको स्रोतको दाबी छ । अख्तियारमा भइरहेको अनुसन्धान रोक्न र कुनै हालतमा पक्रनबाट रोक्न उनले अन्तिम समयमा गुरुङ च्यानललाई समेत प्रयोग गरेको उच्च स्रोतले बतायो ।