दाङ । दाङको तुलसीपुर–८ दुधेनास्थित ‘हाम्रो शान्तिदीप इङलिस स्कुल’ का विद्यार्थीहरुले ज्येष्ठ नागरिकलाई घरैमा गएर सम्मान गरेका छन् । विद्यालयका कक्षा–७ का विद्यार्थीहरुले स्थानीय ज्येष्ठ नागरिक ८६ बर्षीया जेजी सापकोटा र ८४ वर्षीय भुवनेश्वर उपाध्याय दाहालको घरैमा गएर दोसल्ला ओढाएर सम्मान गरेका हुन् ।

विद्यालयको अगुवाइमा भएको ‘ज्येष्ठ नागरिक सम्मान’ कार्यक्रम अन्तर्गत विद्यार्थीहरुले उहाँको घरमैमा पुगेर सम्मान गर्नुका साथै जीवन संघर्षका कथा र प्रेरणादायी सन्देशहरु सुन्ने अवसर पाएका हुन् । बालबालिकाहरुमा समुदायका ज्येष्ठ नागरिकप्रति सम्मान, आदर र कदर गर्ने सँस्कार जागृत गराउन कार्यक्रम आयोजना गरिएको विद्यालयले जनाएको छ । पछिल्लो समय बढ्दो आधुनिकता र सामाजिक सञ्जालको प्रयोगले बालबालिका र ज्येष्ठ नागरिकबीचको सम्बन्धमा दूरी पैदा भएको छ ।