काठमाडौं । नेकपा (एमाले) का निवर्तमान सचिव तथा उपमहासचिव पदका उम्मेदवार योगेश भट्टराईले पार्टी विभाजनको चर्चा निराधार भएको बताएका छन् । महाधिवेशनपछि एमाले झन एकताबद्ध र बलियो भएर अघि बढ्ने उनको दाबी छ । मत गणनास्थलमा सञ्चारकर्मीसँग कुरा गर्दै भट्टराईले महाधिवेशनपछि एमाले फुट्छ भन्ने आशा राख्नेहरूलाई कडा सन्देश दिए । उनले भने, ‘यो महाधिवेशनबाट एमाले फुट्छ भन्ने कसैले सोचेको छ भने, उसको हातमा केही पर्दैन । हामी महाधिवेशन हलमै जति मिलेको देखियौं, चुनावी नतिजापछि त्यसभन्दा बढी मिलेर देखिन्छौं ।’

भट्टराईका अनुसार एमाले कुनै व्यक्ति वा समूहले होइन, कार्यकर्ताले जोगाएर ल्याएको पार्टी हो । त्यसैले महाधिवेशनपछि विभाजन हुन्छ भन्ने प्रश्न नै अप्रासंगिक भएको उनले बताए । ‘एमाले फुट्छ भन्ने प्रश्नलाई हामी पूर्ण रूपमा खारेज गर्छौ’, उनले भने । उनले निर्वाचनबाट आउने नयाँ नेतृत्वले पार्टीलाई थप व्यवस्थित, अनुशासित र जनमुखी बनाउने विश्वास व्यक्त गरे । महाधिवेशनपछि एमाले सबै किसिमका राजनीतिक चुनौतीको सामना गर्न सक्षम भएर जनतामाझ जाने उनले दाबी गरे । भट्टराईले पार्टीभित्रको लोकतान्त्रिक अभ्यास, प्रतिष्पर्धा र बहसलाई कमजोरी होइन, एमालेको शक्ति भएको उल्लेख गर्दै महाधिवेशनले त्यसलाई अझ सुदृढ बनाएको बताए ।