काठमाडौं । कांग्रेस महामन्त्री गगन थापाले पार्टी सभापति शेरबहादुर देउवालाई जेन–जी विद्रोहपछि पार्टी नेतृत्वबाट अलग हुन सुझाव दिएको स्मरण गरेका छन् ।

सोहीअनुसार देउवाले मंसिरभित्र महाधिवेशन गर्नु भन्दै कार्यवाहक सभापति दिएर अलग हुँदा देउवाको सम्मान बढेको बताए ।

तर, फेरि देउवाले सभापतिको कार्यकारी अधिकार प्रयोग गर्न थालेपछि ‘चिज बिग्रिएको’ बताए ।

‘अब समय आएको छ । तपाईंले आराम गर्नुपर्छ । तपाईंले मार्गप्रशस्त गर्नुपर्छ । तपाईंलाई सम्झिनेछौँ कि सुदूरपश्‍चिमको एउटा गाउँबाट आएर तपाईंले लोकतन्त्रका लागि गरेको संघर्ष,’ थापाले भने, ‘तपाईंले मंसिरभित्र महाधिवेशन गर्नुहोस् भनेर कार्यवाहक दिएर जाँदा तपाईंको सम्मान बढेको थियो । तर, अहिले …।’

थापाले विशेष महाधिवेशनको हलले गर्ने निर्णय स्वीकार्ने बताएका छन् । महाधिवेशन प्रतिनिधिहरूले नीति र नेतृत्व दुवै फेर्ने भनिरहेका बेला थापाको यस्तो भनाइ आएको हो ।

हलले नेतृत्व फेरे पार्टी विभाजन हुने संशय प्रकट भइरहेको छ । तर, थापाले महाधिवेशनको हलको म्यान्डेटविपरीत नजाने भनेर नेतृत्वमा तीब्र आकांक्षा प्रकट गरेका हुन् ।