महामन्त्रीद्वय गगन थापा र विश्वप्रकाश शर्माको अगुवाईमा विशेष महाधिवेशन चलिरहेको बेला नेपाली कांग्रेसको संस्थापन पक्षले केन्द्रीय कार्यसमितिको बैठक बोलाएको छ ।

सोमबार साँझ विज्ञप्ति जारी गरेर मुख्य सचिव कृष्णप्रसाद पौडेलले बैठक बोलाइएको जानकारी गराएका हुन् । बैठक मंगलबार बिहान ११ बजे पार्टी कार्यालय सानेपामा बस्नेछ ।

भदौको जेनजी विद्रोहपछि नेपाली कांग्रेसमा महाधिवेशनको विषयलाई लिएर विवाद चर्कँदै गएको थियो । नियमित महाधिवेशन गर्ने विषयमा कुरा नमिलेपछि महामन्त्री द्वयको अगुवाइमा हिजोबाट विशेष महाधिवेशन सुरू भएको छ ।

विशेष महाधिवेशनमा संस्थापन र शेखर कोइराला पक्ष सहभागी छैनन् ।

विशेष महाधिवेशनमा भोलि नेतृत्व छनोटको कार्यक्रम राखिएपछि काँग्रेस फुटको नजिक पुगेको छ । पार्टीलाई विभाजनबाट रोक्नका लागि उचित कदम चाल्ने नेताहरूले देउवा र महामन्त्रीद्वयमाथि दबाव सिर्जना गरिरहेका छन् ।