काठमाडौं । दुर्गा प्रसाईं ९ दिनपछि थुनामुक्त भएका छन् । सर्वाेच्च अदालतकाे आदेशपछि उनी बुधबार बिहान थुनामुक्त  भएका हुन् ।

निर्वाचनसम्बन्धी अफवाह फैलाएकाे आराेपमा उनी यही ४ फागुनमा भक्तपुरस्थित निवासबाट पक्राउ परेका थिए ।

पक्राउपछि उनलाई थुनामुक्तकाे माग गर्दै बन्दीप्रत्यक्षीकरण निवेदन सर्वाेच्चमा परेकाे थियाे । निदवेनमाथि मङ्‍गलबार सुनुवाइ हुँदा थुनामुक्त गर्न सर्वाेच्चले आदेश दिएकाे हाे ।

राजतन्त्र र हिन्दुराष्ट्र पक्षधर उनका समर्थकहरुले दिनहुँ काठमाडाैकाे माइतीघरमा प्रदर्शन गर्दै नि:सर्त रिहाकाे माग गरेका थिए ।

उनी मेडिकल व्यवसायी तथा राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक हुन् ।

उसो त प्रसाईंको पक्राउ र रिहाइ पछिल्लो समय नियमितजस्तै भएको छ । पछिल्ला १६ महिनामा उनी छैटौँपटक पक्राउ परेर रिहा भइसकेका छन् ।

सार्वजनिक शान्तिविरुद्धका गतिविधि, भड्काउ अभिव्यक्ति, साइबर अपराध र आपराधिक उपद्रवजस्ता आरोपमा पक्राउ पर्ने गरेका छन् । तर, उनी अदालतबाट धरौटी, साधारण तारेख वा हाजिरी जमानीमा छुट्दै आएका छन् ।

प्रसाईंलाई यसअघि २८ माघमा काठमाडौंको चाल्नाखेलबाट वीरगञ्ज जाने क्रममा प्रहरीले नियन्त्रणमा लिएको थियो ।

थप अनुसन्धानका लागि साइबर ब्युरोमा बुझाइएका प्रसाईंमाथि निर्वाचन आचारसंहिता उल्लङ्घनको आरोप थियो ।

उनलाई पक्राउ गर्न निर्वाचन आयोगले साइबर अपराधसम्बन्धी कसुरमा कारबाहीका लागि पत्र पठाएको र सोही आधारमा पक्राउ परेका प्रसाईंमाथि ब्युरोले अनुसन्धान गरेको थियो ।

प्रहरीको दाबीमा उनले वीरगञ्जमा निर्वाचनविरोधी गर्न लागेका थिए । सरकार, निर्वाचन आयोग र दलहरू निर्वाचनमा जाँदा प्रसाईंले भने बिथोल्नेगरी कार्यक्रम गर्न लागेपछि उनलाई पक्राउ गर्नुपर्ने निष्कर्षमा सरकार पुगेको थियो ।

प्रसाईं पछिल्ला वर्षहरूमा राजावादी आन्दोलन, सामाजिक सञ्जालमार्फत सार्वजनिक अभिव्यक्ति र विभिन्न प्रदर्शनसँग जोडिँदै आएका छन् ।

उनका समर्थकहरूले उनलाई राजनीतिक रूपमा लक्षित गरिएको दाबी गर्दै आएका छन् ।

तर सुरक्षा निकाय र सरकारी पक्ष भने उनका गतिविधिले सार्वजनिक शान्ति, सामाजिक सद्भाव र कानुनी व्यवस्थामा असर पार्ने भएकाले हस्तक्षेप गर्नुपरेको बताउँदै आएका छन् ।

खासगरी सामाजिक सञ्जालमार्फत अपुष्ट सूचना, कागजात र आरोप सार्वजनिक गर्ने शैलीले साइबर अपराधसम्बन्धी कानुनको प्रयोग बढाएको छ ।

हेर्नुहाेस् प्रसाईं पक्राउको टाइमलाइन

फागुन ४

सार्वजनिक शान्तिविरुद्धको कसुरमा निवासबाट पक्राउ । चार दिन हिरासतमा राखेर अनुसन्धान गर्न प्रहरीलाई अनुमति

माघ २८, २०८२

वीरगञ्जमा अनुमति नपाएको कार्यक्रम गर्न अडान । निर्वाचन बिथोल्नेगरी कार्यक्रम गर्न खोजेको आरोप

माघ १९, २०८२

चितवनमा तोकिएको स्थानबाहेक अन्यत्र कार्यक्रम गर्न खोजेपछि प्रशानको हस्तक्षेप । सार्वजनिक शान्ति भंग गर्न खोजेको आरोप ।

चैत १५, २०८१ (तीनकुने हिंसा)

तीनकुने क्षेत्रमा भएको हिंसात्मक राजावादी आन्दोलनपछि फरार । आन्दोलनमा मृत्यु, घाइते र आगजनी भएपछि उनीमाथि हिंसा गर्न भिडलाई उक्साहट गरेको आरोप । भारतको आसाम राज्यमा पक्राउ ।

मंसिर ४, २०८१

तत्कालीन प्रधानमन्त्री केपी शर्मा ओलीको कम्बोडिएको टेलिकममा लगानी रहेको गम्भीर आरोप लगाउँदै सामाजिक सञ्जालमा अपुष्ट सामग्री सार्वजनिक गरेको अभियोगमा पुनः पक्राउ ।

असोज ६, २०८१

भक्तपुरस्थित निवासबाट पहिलो पटक पक्राउ । विभिन्न व्यक्तिमाथि आपत्तिजनक र आधारहीन आरोप लगाएको उजुरीपछि साइबर ब्युरोले नियन्त्रणमा लिएको ।