सहकारी ठगी आरोपी रवि लामिछाने सभापति भएको दल राष्ट्रिय स्वतन्त्र पार्टी (रास्वपा)ले शक्तिशाली सरकार गठन गर्नै लाग्दा सहकारीपीडितहरू सडकमा आइपुुगेका छन् ।
सभापति लामिछाने विगतमा गोर्खा मिडिया नेटवर्कअन्तर्गतको ग्यालेक्सी फोरके टेलिभिजनको प्रबन्ध निर्देशक छँदा तत्कालीन अध्यक्ष जीबी राईले विभिन्न सहकारीको बचत अपचलन गरेर ल्याएको रकम लामिछानेले दुरुपयोग गरेका थिए । यो कुरा लामिछाने स्वयंले स्वीकारेका छन् ।

सोही कारण थुनामा समेत बसेका लामिछानेले निर्वाचनअघि पार्टीको बाचापत्रमा रास्वपाले सरकार गठन गरेको १०० दिनमै सहकारीपीडितको बचत फिर्ता गर्ने उल्लेख गरेका थिए । तर, बचत फिर्ता कसरी गर्छन् ? टुङ्गो छैन ।

यस्तोबेला सहकारीपीडितहरूले भने फेरि काठमाडौंको माइतीघरमा प्रदर्शन थालेका हुन् । उनीहरूले भनिरहेका छन्– बचत फिर्ता चाहियो ।’

नेपाली कम्युनिस्ट पार्टी (नेकपा)का संयोजक पुष्पकमल दाहाल र नेकपा एमालेका अध्यक्ष केपी शर्मा ओली यसअघि प्रधानमन्त्री भएका बेला पनि सहकारीपीडितहरू न्याय माग्दै सडकमा आएका थिए ।

अब रास्वपाका वरिष्ठ नेता बालेन्द्र शाह (बालेन) प्रधानमन्त्री हुन लाग्दा पनि बालेनको ध्यानाकर्षण गराउन सडक प्रदर्शनमा सहकारीपीडितहरू ओर्लिएका हुन् ।

ओली प्रधानमन्त्री छँदा गठन गरिएको सहकारी सम्बन्धी उच्चस्तरीय जाँचबुझ समितिले ८४ अर्ब बढी रकम सहकारीको हिनामिना भएको प्रतिवेदन सरकारलाई बुुझाएको थियो ।

रास्वपा सभापति लामिछाने विपक्षी भएको काठमाडौं, चितवन, कास्की, रुपन्देही र पर्साका पाँचवटा सहकारीको मात्रै अर्बौँ बचत अपचलन भएको थियो ।

उनै लामिछाने सभापति भएको दल रास्वपाले बालेनको नेतृत्वमा सरकार गठन गर्न लाग्दा थप दबाब सिर्जना गर्न सहकारीपीडितहरूले सकड प्रदर्शनको विकल्प रोजेका छन् ।