काठमाडौं।  यस वर्षको चैतमा फैलिएको बर्डफ्लु दिनानुदिन फैलीरहेको छ। चैत २३ गतेसम्म आउँदा २३ स्थानमा बर्डफ्लू पुष्टि भएको  पशु सेवा विभागले जनाएको हो।

विभागका महानिर्देशक डा. उमेश दाहालका अनुसार चैत महिनामा विभिन्न २३ स्थानमा बर्डफ्लू पुष्टि भएको हो। यसअघि चालु वर्षमा चैतसम्म बर्डफ्लू देखिएको थिएन।

विभागका अनुसार पहिलो पटक चैत ६ गते मोरङको सुन्दरहरैचा र उर्लाबारी नगरपालिकामा एकैसाथ दुई स्थानमा बर्डफ्लू भेटिएको थियो। त्यसपछि सुनसरीमा १२ स्थान, मोरङमा सात स्थान, झापामा दुई स्थान, चितवनमा एक स्थान र काठमाडौंमा एक स्थानमा संक्रमण पुष्टि भएको छ।

महानिर्देशक दाहालका अनुसार बर्डफ्लू देखिएका स्थानहरू नियन्त्रणमा लिइएको छ र हालसम्म थप फैलिएको देखिएको छैन। ती क्षेत्रमा करिब एक लाख चार हजार कुखुरा तथा हाँस नष्ट गरिएको छ।

काठमाडौंको त्रिभुवन विश्वविद्यालय परिसरमा कागमा पनि बर्डफ्लू देखिएको थियो। सुनसरी, झापा र मोरङमा संक्रमण फैलिएको कारण ती जिल्लामा पशुपक्षी ओसारपसारमा प्रतिबन्ध लगाइएको छ।

दाहालका अनुसार बर्डफ्लु देखिएका स्थानलाई ‘ बर्डफ्लू क्षेत्र’ घोषणा गरी आकस्मिक रोग अन्वेषण टोलीमार्फत संक्रमित पशुपक्षी नष्ट गरिएको हो। हाल गरिएको परीक्षणमा धेरै नमूनामा संक्रमण नदेखिएको उनले बताए।

सरकारले बर्डफ्लू देखिएपछि कुखुरा तथा हाँस नष्ट गर्ने र त्यसबापत किसानलाई ७५ प्रतिशत क्षतिपूर्ति उपलब्ध गराउँदै आएको छ।