काठमाडौं । नेपाल विद्युत प्राधिकरण अन्तर्गत कञ्चनपुर वितरण केन्द्र, सप्तरीका प्रमुख (इन्जिनियर) महेन्द्रकुमार दास घुस रकमसहित पक्राउ परेका छन्।

अख्तियार दुरुपयोग अनुसन्धान आयोगका अनुसार उनलाई १ लाख ४० हजार रुपैयाँ घुस लिँदै गरेको अवस्थामा नियन्त्रणमा लिइएको हो।

आयोगका सहायक प्रवक्ता गणेशबहादुर अधिकारीले दिएको जानकारी अनुसार दासले चार्जिङ स्टेसनका लागि ट्रान्सफर्मर जडान गरी लाइन उपलब्ध गराइदिने भन्दै सेवाग्राहीसँग घुस मागेको उजुरी परेको थियो। सोही उजुरीका आधारमा अख्तियारको इटहरी कार्यालयबाट खटिएको टोलीले सोमबार सप्तरीको हनुमाननगर कंकालिनी नगरपालिका–१ बाट उनलाई रंगेहात पक्राउ गरेको हो।

हाल दासमाथि थप अनुसन्धान भइरहेको आयोगले जनाएको छ।