इनरुवा। सुनसरी जिल्लाको भोक्राहा नरसिंह गाउँपालिका-४ स्थित श्री पृथ्वीनारायण माध्यमिक विद्यालय परीक्षा केन्द्रबाट एक नक्कली परीक्षार्थी पक्राउ परेकी छन्।

विशेष सूचनाका आधारमा जिल्ला प्रहरी कार्यालय सुनसरीबाट खटिएको टोलीले माध्यमिक शिक्षा परीक्षा (एसईई) दिइरहेकी हरिनगर-६ की २० वर्षीया नुसरत खातुनलाई पक्राउ गरेको हो।

जिल्ला प्रहरी कार्यालयका प्रहरी उपरीक्षक केशव थेबेका अनुसार खातुनले आफ्नी भाउजू सलमा अजहरको नाममा जारी गरिएको प्रवेशपत्र प्रयोग गरी परीक्षा दिइरहेको अवस्थामा फेला परेकी हुन्।

उनी पहिलो दिनदेखि नै लगातार परीक्षा दिँदै आएकी भएपनि मंगलबार नियन्त्रणमा लिइएको प्रहरीले जनाएको छ।

भोक्राहा-२ स्थित जामिया इस्लामिया मदरसामा कक्षा १० मा अध्ययनरत सलमा हाल कतारमा रहेको जनाइएको छ।

नक्कली परीक्षार्थी बनेर परीक्षा दिनु शिक्षा ऐनविपरीत भएकाले सोहीअनुसार खातुनमाथि कारबाही प्रक्रिया अघि बढाइने सुनसरीका प्रमुख जिल्ला अधिकारी वासुदेव घिमिरेले जानकारी दिए।