काठमाडौं। बलात्कार मुद्दामा कैद भुक्तान गरिरहेका बेला कारागारबाट फरार भएका एक युवक चोरी आरोपमा पक्राउ परेका छन्।

पक्राउ पर्नेमा खोटाङको तुवाचुङ जन्तरखानी नगरपालिका-१० का ३१ वर्षीय उमेश पुरी रहेका छन्। उनलाई काठमाडौंको तीनकुनेबाट पक्राउ गरी थप अनुसन्धानका लागि प्रहरी वृत्त थिमीमा पठाइएको उपत्यका अपराध अनुसन्धान कार्यालयका एसपी मनोहर भट्टले जानकारी दिएका छन्।

प्रहरीका अनुसार २०८२ साउन १९ मा बलात्कार मुद्दामा जेल परेका पुरी भदौ २४ मा डिल्लीबजार कारागारबाट फरार भएका थिए।

चैत २ गते उनले अनलाइनमा बिक्रीका लागि राखिएको स्कुटर किन्ने बहानामा झिकाएर परीक्षणका लागि भन्दै लिएर फरार भएका थिए। बागमती प्रदेश-०२-०४३ प ५३७६ नम्बरको उक्त स्कुटर प्रहरीले बरामद गरेको छ।

उपत्यका अपराध अनुसन्धान कार्यालय थिमी शाखाको टोलीले चैत २२ मा उनलाई पक्राउ गरेको हो।

यसअघि पनि पुरी बहुविवाह तथा चोरीका मुद्दामा पक्राउ परिसकेका छन्। बलात्कार मुद्दामा तेस्रो पटक र चोरीमा चौथो पटक पक्राउ परेका उनीमाथि थप अनुसन्धान भइरहेको प्रहरीले जनाएको छ।